China Renaissance инвестиция банк ташкилотининг асосчиси ва раҳбари Бао Фань алоқага чиқмай қўйди. Бу ҳақда компаниядагилар маълум қилган. Bloomberg’нинг ёзишича, 17 февраль тонгида Гонконг биржасида унинг акциялари 50 фоизга тушиб кетган.

Банк бошқаруви Фаннинг йўқолиши компания фаолиятига боғлиқ ёки боғлиқ эмаслиги бўйича бирор маълумотга эга эмас, фирманинг ўзи ижро қўмитаси бошқаруви остида доимги ишини давом эттирмоқда.

Манбаларга кўра, банкир икки кундан бери алоқага чиқмай қўйган, унинг оиласига эса эркак терговга ёрдам бераётганини айтган. Bloomberg суҳбатдошининг айтишича, сентябрь ойидан бери давом этаётган терговда China Renaissance’нинг собиқ президенти Конг Линь ҳам иштирок этмоқда.

Хитойда компания раҳбарлари бирор ҳукумат тергови фигурантига айланган ҳолатда тез-тез йўқолиб туради, аммо Бао Фаннинг йўқолиши хитойлик молиялачилар орасида катта шов-шув келтириб чиқармоқда. Forsyth Barr Asia’нинг катта таҳлилчиси Уиллер Ченнинг таъкидлашича, фазият компания акцияларининг узоқ муддатли қулашига олиб келиши мумкин, чунки Боа Фань — унинг асосий ходимидир.

Аввалроқ ҳукумат билан зиддият оқибатида оммага кўринмай қолган Alibaba Group асосчиси хитойлик миллиардер Жек Манинг қаерда экани маълум бўлганди. Хитойлик миллиардер 2020 йил октябрь ойида Шанхайда Хитойнинг молиявий назоратчиларини танқид қилганидан кейин оммага кўриниш бермай қўйган. 2021 йил бошидан буён эса мамлакатда бўлиб ўтган бир қанча тадбирда иштирок этиб, мамлакатни тарк этишига тақиқ қўйилгани ҳақидаги миш-мишларга ойдинлик киритган.