АҚШ Конгрессининг юқори палатасидаги республикачилар гуруҳларининг етакчиси Митч Макконнелл Киевга F-16 қирувчи самолётларини бериш ғоясини қўллаб-қувватлади. Бу ҳақда «ТАСС» хабар берди.

«Агарда бу менга боғлиқ бўлганида, шу ишни қилган бўлардим. Ҳа, буни амалга оширар эдим. Урушда тезроқ ғалаба қозониш учун украинларга нима зарур эканини ўйлашимиз керак», — дейди Макконнелл.

Унинг сўзларига кўра, НАТО иттифоқчилари Украинага кутилганидан кўра кўпроқ қуроллар бермоқда, аммо бюрократияга чек қўйиб, жараённи янада тезлаштириш керак.

Аввалроқ Ғарб давлатлари Украина расмийларининг ташаббуси билан Киевга реактив қирувчи самолётларни етказиб бериш имкониятини муҳокама қилишни бошлаганди. Манбага кўра, Вашингтон Киевга «ҳозирда самолётларни юбориш имконсиз» эканини айтган. Унинг айтишича, Украинанинг Ғарб томонидан қўллаб-қувватланиши масаласида «қизил чизиқ» мавжуд бўлиб, 2022 йили у HIMARS залп ўт очиш ракета тизимларини етказиб беришга таъсир кўрсатган, бироқ эътиборга олинмаган эди. Бу каби вазият танкларни юборишда ҳам кузатилган.

Ўз навбатида АҚШ бошқа давлатлар томонидан Украинага қирувчи самолётлар етказиб берилишини олқишлашини, аммо мамлакатнинг ўзи бу борадаги ёрдамни ваъда қилмаслигини билдирган.

Эслатиб ўтамиз, АҚШ президенти Украинага 31 та Abrams танкларини етказиб беришини январь охирларида эълон қилганди. Кейинроқ Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилишини айтганди. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.