Тошкент метрополитенининг ер усти йўналишининг 2-босқичини қуриш ишлари доирасида 18 февраль куни «Дўстлик-2»—7-бекат (Қўйлиқ бозори) оралиғида метро вагонлари ҳаракати тўхтатилиши тўғрисида хабар берилганди. «Тошшаҳартрансхизмат» матбуот хизматининг маълум қилинишича, ушбу йўналишларда вақтинча автобуслар қатнови амалга оширилади.

Қайд этилишича, «Қўйлиқ деҳқон бозори» сўнгги бекатидан ТҲАЙ, Оҳангарон шох кўчаси, Қорасув, Авиасозлар, Элбек кўчалари орқали «Дўстлик» метроси сўнгги бекатигача ҳаракатланувчи Қўйлиқ деҳқон бозори — Дўстлик метроси вақтинчалик автобус йўналиши ташкил этилган.

Мазкур ташкил этилган вақтинчалик автобус йўналишидаги ҳаракат жадваллари сони 6 та, йўналишнинг иш тартиби соат 05:00 дан 23:00 га қадар этиб белгиланган.

Аввалроқ Тошкент метрополитени тирбандликларнинг олдини олиш мақсадида йўловчиларга мурожаат билан чиққани, Тошкент метрополитенида сентябрдан бошлаб поездлар интервали қисқаргани, Тошкент метросида сумкасида бомба борлигини айтиб, ҳазиллашган қиз 5 суткага қамалгани ҳақида хабар берилганди.

Эслатиб ўтамиз, 8 февраль куни Шавкат Мирзиёев 8 февраль куни Тошкент ер усти метроси қурилишининг иккинчи босқичида амалга оширилаётган ишлар билан танишганди. Бугунги кунда Тошкент ер усти метросининг биринчи босқичи ва Сергели йўналишини боғловчи Қўйлиқдан Сергелигача бўлган ер усти йўли барпо этилмоқда. Қарийб 12 километрлик бу қисмда 7 та бекат бўлади. Ҳозирда Қурувчилар даҳасигача борган 5 та бекати қуриб битказилган.