Россия Украинага бостириб киргани туфайли кўплаб давлатларнинг ҳукуматлари ўзларининг ҳарбий доктриналарини қайта кўриб чиқмоқда. Дунёда янги қуролланиш пойгаси бошланди, деб хабар беради Bloomberg.

Қайд этилишича, ҳарбий стратегиялар нафақат Европа давлатлари, балки АҚШ, Хитой, Тайвань ва Ҳиндистон томонидан ҳам кўриб чиқилмоқда. Украинага яқин бўлган кўплаб давлатлар мудофаа харажатларини кескин оширган, ҳарбий ишлаб чиқариш қувватини кенгайтирган, хизматдаги танклар, артиллерия ва ҳаво ҳужумидан мудофаа тизимлари сонини кўпайтирган.

Bloomberg таҳлилчиларига кўра, айрим америкалик амалдорлар Европа ва Осиёдаги хавфсизликка оид вазиятни ўзаро боғлиқ ёки ягона сифатида кўриб чиқмоқда. G7 давлатлари ҳамда БРИКСга аъзо айрим мамлакатларда ядровий урушдан озиқ-овқат муаммоларигача бўлган хавфларни тушуниш кучайди.

НАТО давлатлари 1980 йилдан 2022 йилга қадар мудофаа харажатларини қисқартириб келган, аммо Россиянинг Украинага босқинидан кейин харажатлар ошишни бошлади. 2023 йилда Польшанинг мудофаа харажатлари икки баравардан кўпроққа ошди. Мамлакат бюджетидан мудофаа секторига 20,39 миллиард евро йўналтирилган бўлса, яна 6,3—8,4 миллиард евро бюджетдан ташқари армия жамғармасидан ажратилган. Польшанинг мудофаа борасидаги барча харажатлари мамлакат ЯИМнинг 4 фоизини ташкил этади.

Шунингдек, Германия мамлакат ҳарбий бюджетини молиялаштириш учун 100 миллиард евролик махсус жамғарма ташкил этган. 2024 йилда Германия мудофаа бюджети яна 10 миллиард еврога ошади. Франция ҳам шунингдек, ҳарбий харажатларини оширмоқда. Мамалакат ҳукумати ўтган йили мудофаа учун 400 миллиард евро ажратилишини эълон қилганди — бу олдинги йиллардаги ҳарбий харажатларга нисбатан 30 фоизда кўп демакдир.

НАТО давлатлари ҳарбий можаро юз берса, ўзларининг ўқ-дорилари жуда тез тугаб қолишидан хавотирда. Нашр субҳатдошларининг сўзларига кўра, Caesar гаубицалар Афғонистон, Ливан, Мали ва Ироқда 13 йил давомида отган снарядларни Россия ҳарбийлари Донбассда бир ҳафта ичида ишлатиб юбориши мумкин. Буюк Британиянинг ҳисоблашича, мамлакатда мавжуд 155 миллиметрли снарядларнинг бутун захирасига тенг ўқ-дорилар Россия қўшинлари томонидан Донбассда 2022 йил ёзининг икки кунида сарфлаб юборилган, украиналик ҳарбийлар эса бир ҳафтада шунча снаряд ишлатган.

Аввалроқ Украина жанговар ҳаракатларда «жуда катта миқдорда ўқ-дорилардан» фойдаланаётгани тўғрисида хабар берилганди. Буюк Британия украин ҳарбийларини ўқитиш давомида уларга НАТОга аъзо давлатларнинг армиялари каби снарядларни тежашни ўргатишга уринмоқда.

Январда АҚШ ҳукумати Украинага 2,2 миллиард долларлик янги ҳарбий ёрдам пакетини тайёрлаётгани маълум бўлганди. Унинг ичидан узоқ масофага мўлжалланган ракеталар ўрин олади. Гап Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади. Украина узоқ масофага мўлжалланган ракеталарга муҳтож ва Ғарб ҳамкорларига бундай қуроллар мамлакат ташқарисидаги нишонларга қарши қўлланилмаслигига кафолат беришга тайёрлигини билдирган.