Европа тикланиш ва тараққиёт банки (ЕТТБ) прогнозига кўра, 2023 йилда Ўзбекистон ялпи ички маҳсулотининг (ЯИМ) ўсиши 6,5 фоизни ташкил этади. Келгуси йилда эса мамлакат иқтисодиёти 7 фоизга ўсиши тахмин қилинмоқда.

ЕТТБ экспертларининг прогнозларига кўра, 2023 йилда Марказий Осиёда ЯИМ 4,9 фоизга ўсиши кутилмоқда. Хусусан, ушбу кўрсаткич жорий йилнинг сентябрь ойидан бошлаб нефть ва газ нархларининг юқорилиги, ишчи кучи, капитал ва пул ўтказмалари оқимининг кўпайишида ўз аксини топиши мумкинлииги айтилган.

Бундан ташқари, келгуси 2024 йилда минтақада бу кўрсаткич 5,4 фоизга ўсиши тахмин қилинган. Мутахассислар Марказий Осиёда ЯИМнинг ўсишига асосий омил сифатида режалаштирилган инфратузилмага инвестициялар, товарларнинг юқори нархлари ва Россия корхоналарининг кўчирилиши ҳисобига ишлаб чиқаришнинг ўсиши сабаб қилиб кўрсатишган.

Шу билан бирга, Марказий Осиё мамлакатлари орасида ялпи ички маҳсулотнинг энг катта ўсиши Тожикистонда прогноз қилинмоқда — 2023–2024 йилларда 8 фоизга. Кейинги ўринларни Қирғиситон ҳамда мос равишда Ўзбекистон ва Туркманистон эгаллаган.

Маълумот учун, Ўзбекистон Марказий банки 2023 йилда иқтисодий ўсишни 4,5-5 фоиз атрофида бўлишини кутмоқда. Жаҳон банки прогнозларига кўра, жорий йилда ЯИМ ўсиши 4,9 фоиз, 2024 йилда эса 5,1 фоизни ташкил этади.

Аввалроқ Ўзбекистон ЯИМ ҳажми 2022 йилда 80,4 млрд долларга етгани ҳамда Ўзбекистоннинг ЯИМ ҳамда саноат статистикаси ўртасидаги фарқ сабаби тушунтирилгани ҳақида хабар берилганди.