Президент матбуот хизматининг Facebook ва YouTube’даги расмий саҳифалари ҳамда «Ўзбекистон 24» телеканалида 19 февраль куни соат 18:30 да намойиш этиладиган фильм Парижда бўлиб ўтаётган Ўзбекистоннинг бой маданий меросига бағишланган иккита йирик экспозиция ҳақида ҳикоя қилади.

Маълумот учун, Франциянинг Париж шаҳридаги Лувр музейида 2022 йилнинг 23 ноябрь куни Ўзбекистон меросига бағишланган кўргазма очилганди. Кўргазмада ҳозирги Ўзбекистоннинг жанубий ҳудудидан ўтган Буюк Ипак йўли ҳақида ҳикоя қилиниб, унда қарийб икки минг йиллик даврни қамраб олувчи 169 та экспонат, жумладан, Ўзбекистоннинг 16 та музейидан 138 дона осори-атиқа, шунингдек, дунёнинг етакчи музейларидан 31 та музей ашёси намойиш этилди.

Шунингдек, Париждаги Араб дунёси институтида ҳам 23 ноябрь куни Ўзбекистон халқ амалий санъатининг ноёб намуналари кўргазмаси ҳам очилганди. Унда Ўзбекистоннинг ХИХ аср ўрталаридан то ХХ аср бошларигача бўлган даври мобайнида яратилган ноёб халқ амалий санъати асарларини намойиш этувчи Францияда илк бор халқаро жамоатчилик диққат-эътиборига Ўзбекистоннинг 9 та йирик музейларидан 300 дан ортиқ ашёлар, жумладан, тўқимачилик, либослар, пойабзал, бош кийимлар, заргарлик буюмларидан иборат тўпламлар, шунингдек, Нукус, Самарқанд ва Бухоронинг энг йирик музейларидан Туркистон ва рус авангардига тааллуқли 24 та мўйқалам асарлари тақдим этилди.

Аввалроқ Шавкат Мирзиёев Францияга давлат ташрифи давомида мамлакат президенти Эммануэль Макрон билан Париждаги Лувр музейига ташриф буюриб, Луврдаги ўзбек халқининг бой маданий меросига бағишланган «Ўзбекистон воҳаларининг мўъжизалари. Карвон йўллари чорраҳасида» кўргазмаси билан танишганди.