Қашқадарёда шифокорлар 39 ёшли эркакнинг танасидан 5 килограмлик ўсимтани олиб ташлади. Бу ҳақда Қашқадарё вилояти соғлиқни сақлаш бошқармаси ахборот хизмати хабар берди.

Вилоят ССБнинг маълум қилишича, Ғузорлик II гуруҳ ногирони, 39 ёшли эркак бемор белининг чап соҳасидаги катта ўсма шиш (нейрофиброматоз, 1-тип) сабабли узоқ йиллардан буён ҳаракатланишда қийинчиликлар ҳамда ҳолсизликлардан азият чекиб келган.

Республика ихтисослаштирилган онкология ва радиология илмий-амалий тиббиёт маркази Қашқадарё филиалида бажарилган операция натижасида беморнинг танасидан 5 килограмлик ўсма олиб ташланган. Ҳозирда беморнинг аҳволи қониқарли даражада деб баҳоланган ҳамда режали муолажаларни давом эттирмоқда.

Маълумот учун, тиббиётда «Фил одам» синдроми деб номланган касаллик бор. Илмий тилда нейрофиброматоз (Реклингхаузен синдроми) деб аталадиган бу ноёб наслий хасталик дунёда ҳар 100 минг аҳолига 30-40 нафарга тўғри келади. Касаллик тери, асаб, таянч-ҳаракатланиш тизимлари, кўриш ва эндокрин аъзолари зарарланиши билан кечади.

Аввалроқ Ўзбекистон тиббиёт тарихида илк бор циам эгизаклари ажратиб олингани ҳамда Ўзбекистонда илк бор робот-жарроҳ ёрдамида мураккаб амалиёт ўтказилгани ҳақида хабар берилганди.