Ижтимой тармоқларда Тошкент шаҳрида бола ўғрилари пайдо бўлгани айтилган хабарлар тарқалмоқда. Ҳолат юзасидан Тошкент шаҳар ИИББ расмий маълумот берди.

Пойтахт ИИББ ижтимоий тармоқларда бола ўғрилари пайдо бўлгани ҳақида тарқалаётган хабарларни асоссиз деб атади.

«Бу хабарлар остида бир нечта аёлларнинг фотосурати ва шахсий маълумотлари жойлаштирилган бўлиб, турли муҳокамаларга сабаб бўлмоқда. Ҳурматли фуқаролар, бу каби асоссиз хабарларга ишонмаслигингизни ва аҳоли орасида сунъий равишда шов-шув кўтармаслигингизни сўраймиз», — дейилади хабарда.

Бундан ташқари, Тошкент шаҳар ИИББнинг маълум қилишича, ҳозирда гўёки бола ўғрилари пайдо бўлгани ҳақида ёлғон хабар тарқатиб, бир нечта аёлларнинг фотосурати ва шахсий маълумотларини тарқатаётган шахсларни шахсини аниқлаш юзасидан текширув ўтказилмоқда.

«Унутманг, ёлғон ахборот тарқатиш, шунингдек шахснинг розилигисиз шахсий маълумотларини ошкор қилиш қонунчиликка мувофиқ жавобгарликка тортишга асос бўлади», — дея огоҳлантирган Тошкент шаҳар ИИББ ўз мурожаатида.

Эслатиб ўтамиз, аввалроқ ҳам ижтимоий тармоқларда Тошкентда бола ўғрилари пайдо бўлгани ҳақидаги хабарлар тарқалганди. Ҳолат юзасидан ИИВ ахборот хизмати раҳбари Шоҳрух Ғиёсов Тошкентда бола ўғрилари пайдо бўлгани айтилган миш-мишларни асоссиз ва ҳақиқатдан йироқ деб атагандию

Шунингдек, 2021 йилнинг сентябрь охирларида Тошкент шаҳрида номаълум шахс автомобилига 5 ёшли болани ўтқизмоқчи бўлгани ҳақида овозли хабар тарқалганди. Маълумот юзасидан текширув ишлари ўтказилгач, унинг ёлғон экани маълум бўлганди. 2022 йил октябрда эса Шоҳрух Ғиёсов Тошкентда бола ўғрилари пайдо бўлгани айтилган миш-мишларга муносабат билдирганди. «Бола ўғирлаш билан боғлиқ аудио миш-мишлар тарқалмоқда. Маълум қиламизки, бу каби хабарлар асоссиз ва ҳақиқатдан йироқ. Интернет орқали ёлғон маълумот тарқалишига сабабчи бўлаётган субъектларнинг ҳаракатларига ҳуқуқий баҳо берилади», — деганди у.