Тошкент шаҳар Юнусобод туманида тўртта автомобиль тўқнашиши оқибатида улардан бири ёниб кетди. Бу ҳақда Тошкент шаҳар ИИББ Йўл ҳаракати хавфсизлиги бошқармаси хабар берди.

Маълум қилинишича, Юнусобод тумани Амир Темур кўчасида 18 февраль куни соат 19:30 да Қатағон қурбонлари хотираси боғи ёнида Cobalt, Spark, Lacetti ва Matiz автомобиллари иштирокида ЙТҲ содир бўлган. Натижада Cobalt автомобили ёниб кетган.

Ҳодиса оқибатида Cobalt ва Matiz ҳайдовчилари жароҳатланган. Ёнғин эса ўт ўчирувчилар томонидан ўчирилган. Ҳозирда мазкур ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ҳаракатлари олиб борилмоқда.

Аввалроқ Тошкентда бешта автомобиль иштирокида ЙТҲ содир бўлгани, Жиззахда автобус ҳайдовчиси ухлаб қолиб, 7 та машина билан ЙТҲ содир этгани, Андижонда 8 та машина иштирокида ЙТҲ содир бўлгани ҳамда Ангренда тормози ишламай қолган Isuzu 5 та машина билан тўқнашгани ҳақида хабар берилганди.