Bild нашри журналисти Юлиан Рёпке АҚШ президенти Жо Байден Киевга ташриф буюрганини маълум қилди, деб ёзади Meduza.

Аввалроқ АҚШ президентининг Киевга келгани ҳақида адвокат ва журналист Марк Фейгин ёзганди.

Украина ОАВлари 20 февраль тонгидан бошлаб Киев марказига элтувчи йўллар ёпилганини ёзмоқда, мамлакат ташқи ишлар вазири ўринбосари Андрей Мельник эса Украина пойтахтига «муҳим, асосий шериклар» ташриф буюрганини айтган.

Киев расмийлари Жо Байденнинг ташрифига оид хабарларга ҳозирча ҳеч қандай муносабат билдирмаган. Айни вақтда Киев вилояти ва Украинанинг бошқа қатор вилоятларида Беларусь ҳудудида Россия авиацияси фаоллиги ошгани сабаб ҳаво тревогаси эълон қилинган.

Эслатиб ўтамиз, Владимир Зеленский Россия ҳужуми бошланганидан бери биринчи марта хорижий сафарини амалга оширганди. У 21 декабрь куни Украина етакчиси расмий ташриф билан Вашингтонга борган. Томонлар бир неча ҳафта давомида «саҳна ортида» эҳтимолий ташриф тафсилотларини муҳокама қилган.

Ўшанда Россия Украина етакчисига суиқасд уюштирилиши мумкинлиги хавфи сабаб АҚШда хавфсизлик чоралари кучайтирилган. Юқори мартабали амалдор хавфсизлиги учун Украинанинг АҚШдаги элчихонаси ходимларига ҳам ташриф дастури бўйича маълумот берилмаган. Associated Press маълумотларига кўра, Зеленский Польшанинг Жешув шаҳрига поездда, у ерда АҚШ Ҳарбий-ҳаво кучларининг самолётида Вашингтонга учиб келган.