АҚШ президенти Жо Байден администрацияси Владимир Зеленский жамоасини Украина Қуролли Кучлари фронтда эришган «муваффақиятларни мустаҳкамлашга» ва янги контрҳужумларни бошлашга чақирди. Бу ҳақда Politico нашри ўз манбаларига таяниб хабар берди.

Оқ уй, шунингдек, Киевга контрҳужумга ҳозирдан, АҚШ ва Европа қуроллари ҳеч қандай тўсиқсиз келаётган вақтда ўтишни тавсия қилган. Нашр маълумотларига кўра, Байден администрацияси Европа давлатлари томонидан кўрсатилаётган қўллаб-қувватлов чекланиб қолиши мумкинлигидан хавотирда.

Вашингтонда Украинага ёрдам кўрсатишни ҳамон ҳар иккала партия — демократлар ҳам, республикачилар ҳам қўллаб-қуватламоқда. Politico’нинг ёзишича, Байден администрациясидаги айрим амалдорлар келажакда Киевга ҳарбий ёрдам юбориш қийинлашишидан ташвишда, чунки аксар қисмини республикачилар ташкил этадиган Вакиллар палатасида қарама-қаршиликлар ортиб бормоқда.

Оқ уй Киевга Байденнинг 20 февраль куни Польшага уюштирадиган ташрифи фонида контрҳужумни ортга сурмасликни маслаҳат берган. Ташриф давомида Байден президент Анжей Дуда ва НАТО етакчилари билан учрашиб, Киевга ёрдам кўрсатишни давом эттириш зарурлигига урғу беради. Польша ОАВлари Байденнинг Зеленский билан учрашуви ҳақида ҳам ёзмоқда, аммо Оқ уй бундай режалар йўқлигини билдирган.

АҚШ президенти Жо Байден 7 февраль куни кечаси мамлакатдаги вазият бўйича Конгрессга мурожаат қилганди. У ўз нутқининг якунида 2022 йилда ҳам «Владимир Путин ноинсофларча Украинага қарши уруш эълон қилганидан бир неча кун ўтиб» Конгрессга худди шу каби мурожаат билан чиққани эслатиб ўтган. Ундан олдинроқ Байден Украинадаги можаронинг «критик нуқтаси» ҳақида гапирганди.

Эслатиб ўтамиз, декабрь охирларида АҚШ Украинага 1,85 миллиард долларлик янги ёрдам пакетини расман эълон қилганди. Шунингдек, январь бошларида Донецкдаги «ПТУ»га берилган ракета зарбалари оқибатида камида 63 нафар россиялик ҳалок бўлгани, АҚШ Украинага Stryker зирҳли транспортёрларини етказиб бериши маълум бўлган.