Байденнинг Киевга ташрифидан олдин Қўшма Штатлар ва Россия ядровий қуролга эга икки давлат ўртасида тўғридан-тўғри тўқнашувнинг олдини олиш мақсадида алоқада бўлган, дея хабар бермоқда Associated Press.

Нашрнинг маълум қилишича, Америка томони Байденнинг ташрифидан бир оз олдин Россия билан ядровий тўқнашувга йўл қўймаслик мақсадида музокара ўтказган.

«Оқ уй маълумотларга аниқлик киритмади, лекин икки ядровий қуролга эга давлатни тўғридан-тўғри тўқнашувга олиб келиши мумкин бўлган ҳар қандай нотўғри ҳисоб-китобларга йўл қўймаслик учун Байденнинг ташрифидан бир оз олдин АҚШ Россия билан асосий алоқа низоларини бартараф этиш учун музокаралар ўтказган», дейилади хабарда.

Маълумотларга кўра, Байден Украинада бўлиб турган пайти Америка разведка самолётлари, жумладан, ҳаво радарлари билан жиҳозланган E-3 Sentry ва C-135W Rivet Joint электрон бошқариладиган самолётлар Польша ҳаво ҳудудидан Киевни мунтазам равишда кузатиб турган. Айнан АҚШ етакчисининг Киевга ташрифи пайтида бутун Украина бўйлаб ҳаво тревогаси эълон қилинган. Бироқ Россия томони ракета ёки авиация билан мамлакат ҳудудига зарба бермаган.

Маълумот учун, Киевга келган АҚШ президенти Жо Байден Украинага янги 500 миллион долларлик ҳарбий ёрдам пакетини эълон қилганди. Янги ҳарбий ёрдам пакетига артиллерия ўқ-дорилари, танкка қарши тизимлар ва ҳаво кузатуви радарлари киради. Шунингдек, Украина президенти Владимир Зеленскийнинг айтишича, президентлар учрашув чоғида узоқ масофага учувчи қуроллар, шунингдек, Украинага ҳали етказиб берилмаган қуролларни муҳокама қилган: «Музокараларимиз жуда самарали бўлди», — дея қўшимча қилган Зеленский.

Аввалроқ АҚШ президенти Жо Байден Киевга ташриф буюргани ҳақида хабар берилганди.