Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Шавкат Мирзиёев давлат ташрифи билан Мисрга борди

Шавкат Мирзиёев Миср Араб Республикаси президенти Абдулфаттоҳ Ас-Сисининг таклифига биноан 20 февраль куни давлат ташрифи билан Миср пойтахти Қоҳирага келди. Ўзбекистон етакчисини аэропортда мамлакат президенти Абдулфаттоҳ ас-Сиси кутиб олди ва самимий қутлади.

Шу ернинг ўзида Шавкат Мирзиёевнинг ташрифи муносабати билан икки мамлакат байроқлари кўтарилди ҳамда фахрий қоровул саф тортди.

Бундан ташқари, иккала давлат раҳбарларининг қисқа учрашуви ҳам бўлиб ўтди. Маълум қилинишича, Шавкат Мирзиёев бугуннинг ўзида Қоҳирада Аҳмад Фарғоний томонидан барпо этилган «Миқёси Нил» иншоотига ташриф буюради ва Миср цивилизацияси миллий музейи билан танишади.

Тошкентда мактаб ўқувчисини ўғирламоқчи бўлгани айтилган шахс қўлга олинди

Ижтимоий тармоқларда Тошкент шаҳрида номаълум шахс болани қўлидан тортиб, мактаб ҳудудидан судраб олиб кетмоқчи бўлгани акс этган видеолар тарқалди.  Тошкент шаҳар ИИББнинг маълум қилишича, ушбу ҳолат 19 февраль куни Яшнобод туманида содир бўлгани аниқланган. Унга кўра, номаълум мактаб ўқувчиси ҳисобланган 2011 йилда туғилган М.О.ни тўхтатиб, қўлидан ушлаб: «Шу мактабда таҳсил оласанми?», — деб сўраган. Натижада вояга етмаган мактаб ўқувчиси ушбу шахсни танимаганлиги сабабли у билан гаплашмаслигини билдириб, қўйиб юборишини айтган ҳамда уйига кетган.

Ҳолат юзасидан олиб борилган терговга қадар текширув натижаларига кўра, видеодаги шахс 1994 йилда туғилган М.У. эканлиги аниқланган. Шунингдек, қайд этилишича, ҳозирда бола ота-онасининг ёнида соғ-саломат ҳолатда.

Ўзбекистондан Россияга борувчи меҳнат мигрантларининг сони кескин ошди

Россияда бугунги кунда ишлаётган меҳнат мигрантларининг 90 фоиздан ортиғи Ўзбекистон, Тожикистон ва Қирғизистон давлатлари ҳиссасига тўғри келмоқда. Аниқланишича, Россияга 2022 йилда ишлаш учун келган хорижликлар сони 3,47 миллион кишини ташкил этган. Бу бир йил олдинги кўрсаткичдан 871 минг кишига кўпдир.

Россияга 2022 йил давомида энг кўп ташриф буюрган меҳнат муҳожирларининг оқими Ўзбекистон ҳиссасига тўгри келган. Унга кўра, ўтган йил давомида Россия борган ўзбекистонликрнинг сони 35,1 фоиз ёки 377,7 минг кишига ошган. Бундан ташқари, 19 февралга ўтар кечаси Москвада Ўзбекистон, Россия, Тожикистон ва Қирғизистон фуқаролари ўртасида оммавий муштлашув юз берди. Дастлабки маълумотларга кўра, кафеда бошланган оғзаки жанжал оммавий муштлашувга айланиб кетган. Натижада воқеа жойига етиб келган ҳуқуқ-тартибот идоралари ходимлари 15 кишини қўлга олиб, ҳодиса сабабларини аниқлаш учун ички ишлар бўлимига олиб кетган.

Фарғона гарнизонида жанговар-тактик ўқув машғулотлари бошланди

Фарғона вилоятида Шарқий ҳарбий округга қарашли гарнизонда 20 февраль куни режалаштирилган жанговар-тактик ўқув машғулотлари бошланди. Машғулотлар давомида ҳарбий хизматчиларнинг жанговар тайёргарлигига ҳар томонлама баҳо берилади. 

Қайд этилишича, машғулотлар режасига мувофиқ жанговар техникаларнинг шаҳар атрофида ҳаракатлари кузатилади.

Ўзбекистон фуқароси Қозоғистонда қурол дўконига ҳужум қилди

Қозоғистоннинг Чимкент шаҳрида Ўзбекистон фуқароси қурол дўконларининг бирига ҳужум қилди. Натижада воқеа жойига етиб борган хавфсизлик кучлари ҳамда ўзбекистонлик эркак ўртасида отишма содир бўлган.

Қуролли ҳужум натижасида полициячилардан бири жароҳатланган. Ўзбекистон фуқароси эса қўлга олинган. Гумонланувчи Ўзбекистон фуқароси Чимкентда ижарага олинган квартирада яшаган. Унинг ёнидан ов милтиғи ва ўғирланган сайга караби олиб қўйилган.

Шунингдек, бошқа хабарлар:

• Тошкентдаги ички кийимлар дўконини танқид қилган блогер диний контенти учун жаримага тортилди;
• Ўзбекистонда 21 февраль куни ҳаво ҳарорати 22 даражагача кўтарилади;
• Туркманистон юборган бепул суюлтирилган газ Қорақалпоғистон ва Хоразм аҳолисига тарқатилади.

Хўш, дунёда нима гап?

АҚШ президенти Жо Байден Украина пойтахти Киевга ташриф буюрди

АҚШ президенти Жо Байден 20 февраль куни Польшага ташрифи доирасида олдиндан эълон қилинмаган ташриф билан Украина пойтахти Киевга етиб келди. Украина президенти Владимир Зеленский ҳам АҚШ президентининг Киевга ташрифини расман тасдиқлаган:: «Жозеф Байден, Киевга хуш келибсиз! Сизнинг ташрифингиз барча украинларни қўллаб-қувватлашда жуда муҳим аҳамиятга эга», – дея ёзиб қолдирган Украина етакчиси.

Киевга қуруқ қўл билан келмаган Жо Байден Украина учун 500 миллион долларлик янги ҳарбий ёрдам пакетини эълон қилди. Украина президенти Владимир Зеленскийнинг айтишича, президентлар учрашув чоғида узоқ масофага учувчи қуроллар, шунингдек, Украинага ҳали етказиб берилмаган қуролларни муҳокама қилган.

«Дунё Россиянинг Украинага шафқатсизларча бостириб киришининг бир йиллигини нишонлашга тайёрланар экан, мен бугун Киевда президент Зеленский билан учрашиб, Украина демократияси, суверенитети ва ҳудудий яхлитлигига қатъий ва қатъий содиқлигимизни яна бир бор тасдиқлайман», — дея изоҳлаган Байден Киевга ташрифини.

Бундан ташқари, Associated Press’нинг хабар беришича, Америка томони Байденнинг ташрифидан бироз олдин Россия билан ядровий тўқнашувга йўл қўймаслик мақсадида руслар билан музокара ўтказган. Нашр сўзини исботи сифатида Байденнинг Киевда бўлиб турган пайтида Украина бўйлаб ҳаво тревогалари эълон қилинганига қарамай Россиа томонидан зарба берилмаганини келтириб ўтган.

Олимлар ҳаёт манбаларини аниқлаш учун Ер марказига қудуқ қазийди

Ерда ҳамда бошқа сайёраларда ҳаётнинг пайдо бўлишига туртки бўлиши мумкинлигини аниқлаш ниятида бундан 20 йил олдин қазилган Атлантика океани тубидаги қудуқни янада чуқурроқ қилиб қазиш ишлари давом эттирилади. Қудуқни 2057 метргача чуқурлаштириш режалаштирилган. Айни пайтда охирги марта 20 йил олдин қазилган қудуқнинг чуқурлиги 1,4 минг метрни, диаметри эса 38 сантиметрни ташкил этади.

Қудуқ тубидаги ҳарорат цельсий бўйича 200 даражадан ошиши кутилмоқда. Гуруҳ таркибидан геологлар, миркобиолог ва бошқа олимлар ўрин олади. Шунингдек, Олимлар қудуқ қазимоқчи бўлган массив — бу тектоник плиталар бир-биридан ажралиб турадиган тектоник дарчадир. Натижада Ер мантиясининг моддаси ер юзасига чиқади. Бундай дарчаларни бурғулаш ишлари давомида олимлар сайёранинг бошқача шароитда олишнинг имкони бўлмаган намуналари ички тузилмасини ўрганиш имкониятига эга бўлади.

Бугун билан яшанг. «Бугун»да қолинг.