Ўзбекистонда кўчмас мулк билан боғлиқ хизматларининг энг катта ҳажми Тошкент шаҳрига тўғри келган. Бу ҳақда Статистика агентлиги хабар берди.

Агентликнинг дастлабки маълумотларига кўра, 2022 йилда кўчмас мулк билан боғлиқ хизматлар ҳажми қарийб 9,7 триллион сўмни ташкил этган. Ўзбекистонда 2022 йилда кўчмас мулк билан боғлиқ хизматлар ҳажмида 4,8 триллион сўм билан Тошкент шаҳрининг улуши энг юқори бўлган.

Аввалроқ Прогнозлаштириш ва макроиқтисодий тадқиқотлар институти (ПМТИ) мутахассислари Тошкент шаҳрида уй-жой нархларининг ўзгаришини таҳлил қилганди. Таҳлил натижаларида келтирилишича, Тошкент шаҳридаги кўчмас мулк бозорида сотувлар сони 8 фоизга (7 814 тадан 8 408 тага) ошган. 1 кв метр нархи ўртача 27 фоизга ўсган: агар 2021 йилнинг ноябрида бу кўрсаткич 849 долларни ташкил этган бўлса, 2022 йилнинг ноябрида бу кўрсаткич 1078 долларга етган.

Тошкент шаҳрининг бешта туманида 1 квадрат метр уй-жой нархи шаҳардаги ўртача кўрсаткичдан (1078 доллар) сезиларли даражада юқори: Миробод туманида – 1285 доллар (+20 фоиз), Яккасаройда – 1178 доллар (+9 фоиз), Шайхонтоҳурда – 1144 доллар (+6 фоиз), Мирзо Улуғбекда – 1137 доллар (+6 фоиз) ва Юнусободда – 1117 доллар (+4 фоиз).

Мавзуга доир: Ўзбекистон уй-жой арзонлиги бўйича жаҳон рейтингида қайси ўриндалиги маълум қилинди

Аввалроқ Ўзбекистонда квартиралардан ижарачиларни мажбурлаб чиқариб юбориш ва нархни асоссиз ошириш ҳолатларига изоҳ берилганди. Таъкидланишича, ижара шартномаси тарафларнинг келишуви билан бекор қилинади. Ижара шартномасини ижарага берувчининг талаби билан бекор қилиш муайян асосларга кўра фақат суд тартибида амалга оширилади. Шунингдек, Ўзбекистондаги талабаларга икки ойлик ижара ҳақи ҳеч қандай шартномасиз тўлаб берилиши маълум қилинди. Бундан ташқари, Тошкент шаҳрида йил бошидан буён 1 квадрат метр учун квартиранинг ўртача ижара нархи 22,4 фоизга ошгани ҳақида хабар берилганди.