Ўзбекистон ҳудуди ҳафта давомида илиқ ҳаво массаси таъсири остида бўлади. Бу ҳақда Республика Гидрометеорология хизмати хабар берди.

Қайд этилишича, ҳарорат фони нисбатан текис бўлади. Ҳаво ҳарорати асосан кечалари 2–7 даража илиқ, кундуз кунлари 13–18 даража илиқ, айрим кунларда 20–22 даражагача илиқ бўлади.

Ҳафтанинг катта қисмида Ўзбекистон ҳудуди бўйича ёғингарчилик кутилмайди. Фақат 22 февраль чоршанба куни республика бўйича баъзи жойларда бир оз ёмғир ёғади, шимолий ҳудудлар, энг чекка жануб ва Фарғона водийсида ёғингарчилик кутилмайди. Айрим жойларда шамол тезлиги 15–20 метр/секундгача кучаяди.

Жума куни республиканинг шимоли-ғарбий ҳудудларига Россиянинг Европа қисми устида шаклланган совуқ ва нам ҳаво массаси кириб келиши бошланади. Қорақалпоғистон Республикаси ва Хоразм вилоятида 24 февраль куни баъзи жойларда ёмғир ва қор кўринишидаги ёғингарчилик бўлади, кундузги ҳарорат 3–6 даражагача илиқ бўлади. Бухоро, Навоий вилоятларида баъзи жойларда бир оз ёмғир ёғиши мумкин.

Дам олиш кунлари совуқ ва нам ҳаво массасининг кириб келиши республиканинг барча ҳудудларига тарқалади.

Тошкент шаҳрида 20–24 февраль кунлари ҳаво бир оз булутли бўлади, вақти-вақти билан ўзгариб туради, ёғингарчилик кутилмайди, фақат 22 февралда куннинг иккинчи ярмида бир оз ёмғир ёғиши мумкин. Шамол шарқдан 5–10 метр/секунд тезликда эсади. Ҳарорат асосан кечалари 3–6 даража илиқ, кундуз кунлари 16–20 даража илиқ, 22 февралда 14–15 даража илиқ бўлади.

Эслатиб ўтамиз, 3 февралдан Ўзбекистон ҳудудига Каспий денгизи ҳудудларидан нам ҳаво массалари кириб келиши бошлаган, 13 февраль куни эса баъзи жойларда ҳарорат 12 даражагача исиди. 20 февраль, душанба куни Тошкент, Самарқанд, Жиззах, Сирдарё вилоятларида ҳарорат 18 даражагача исиши маълум қилинганди.