Қозоғистонда Ўзбекистон фуқароси қурол дўконига ҳужум қилди — видео
Қозоғистоннинг Чимкент вилоятида Ўзбекистон фуқароси қурол дўконига ҳужум қилди. Бу ҳақда Қозоғистон Ички ишлар вазирлиги матбуот хизмати хабар берди.
Маълум қилинишича, 20 февраль куни соат 14:40 лар атрофида Чимкентдаги қурол дўконларининг бирига Ўзбекистон фуқароси бостириб кириб, отишма уюштирган. Натижада воқеа жойига зудлик билан етиб борган хавфсизлик кучлари ҳамда ўзбекистонлик эркак ўртасида отишма содир бўлган. Оқибатда полициячилардан бири жароҳатланган. Ўзбекистон фуқароси эса қўлга олинган.
Аниқланишича, Ўзбекистон фуқароси Чимкентда ижарага олинган уйда яшаётган бўлган. Текширувлар давомида унинг ёнидан ов милтиғи топилган. Ҳозирда воқеа жойида тергов-тезкор гуруҳи иш олиб бормоқда. Ҳодисанинг барча ҳолатларига ойдинлик киритилиши маълум қилинган.
Аввалроқ Россияда террорчилик ташкилотига алоқадор Ўзбекистон фуқароси 9 йилга қамалгани, шунингдек, яна бир ўзбекистонлик Россияда террористларни молиялаштирганликда айбланиб, 16 йилга қамалгани ҳақида хабар берилганди.
