Тошкент шаҳри Мирзо Улуғбек туманида 35 туп дарахт ноқонуний кесилиши оқибатида табиатга қарийб 200 миллион сўм зарар етказилди. Бу ҳақда Бош прокуратура ахборот хизмати хабар берди.

Маълум қилинишича, 17 февраль куни тумандаги «М.Т.» МЧЖга ижарага берилган 5000 квадрат метр ҳудуддаги 35 туп дарахт махсус қасддан нобуд қилинган. Оқибатда ўсимлик дунёсига 196 миллион сўм миқдорида зарар етказилган.

Мирзо Улуғбек тумани прокуратураси томонидан ҳолат бўйича Жиноят кодексининг 198-моддаси (экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилди. Ҳозирда Мирзо Улуғбек тумани ички ишлар органлари фаолиятини мувофиқлаштириш бўлими тергов бўлими томонидан дастлабки тергов ҳаракатлари олиб борилмоқда.

Аввалроқ Давлат экология қўмитаси бошқарма бошлиғи Абдурашид Содиқов брусчатка дарахтлар илдизига жудаям фойда келтириши ҳақида айтиб ўтганди, шунингдек, Тошкентдаги цирк фавворалари олдига дарахтлар туваги билан экилгани аниқланганди.

Эслатиб ўтамиз аввалроқ Тошкентдаги қурилиш объектида 16 туп қимматбаҳо дарахт кесиб ташланиши оқибатида ўсимлик дунёсига 3,5 миллиард сўмдан ортиқ зарар етказилгани хабар берилганди. Бош прокуратура ҳолат юзасидан жиноят иши қўзғатилганини маълум қилди.