Сурия ва Туркия чегарасида 20 февраль куни кетма-кет учта янги зилзила содир бўлди. Бу ҳақда Reuters ва Al Jazeera воқеа жойида бўлган гувоҳларга таяниб хабар бермоқда.

Дастлабки маълумотларга кўра, Туркиянинг Сурия билан чегарадош Ҳатай вилояти ҳудудида Европа–Ўрта Ер денгизи сейсмология маркази маълумотларига кўра 6,3 магнитудали иккита зилзила содир бўлди.

«Жуда кучли силкинишлар бўлди, вайронагарчилик бор», — дейди CNN Турк телеканали Ҳатай вилоятида содир бўлган кучли зилзила ҳақида.

Туркия Фавқулодда вазиятлар вазирлигининг хабар беришича, маҳаллий вақт билан соат 20:04 да 6,4 магнитудали зилзила содир бўлган, эпицентри Ҳатайнинг Дефне туманида бўлган. Ушбу зилзиладан 3 дақиқа ўтиб, 5,8 магнитудали иккинчи ер силкиниши Самандағда қайд этилди. Зилзила содир бўлган ҳудудда электр таъминоти бутунлай узилган, деб хабар бермоқда A Haber нашри.

Кейинроқ маълум бўлишича, соат 20:19 да Самандағда яна 5,2 магнитудали зилзила қайд этилган. Бундан ташқари, Al Jazeera нашрининг ёзишича, Туркиянинг Ҳатай вилоятида кузатилган зилзилалар Сурия шимолидаги биноларнинг қулашига олиб келган. Қурбонлар ҳақида ҳозирча маълумотлар йўқ.

Маълумот учун, Туркия жануби-шарқида 6 февраль тонгида юз берган 7,7 балли зилзила оқибатида ҳалок бўлганлар сони 41 020 кишига етди. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади.