Россия армияси баҳорда ҳужум бошлаши прогноз қилинаётган вақтга қадар Украина Ғарб давлатлари ваъда қилган замонавий жанговар танкларнинг камида чорак қисмини қабул қилиб олади, деб ёзади The Times газетаси.

Киев иттифоқчилар умумий ҳисобда 320 та танк беришини кутмоқда, аммо ҳозирги ҳисоб-китобларга кўра жанговар машиналарнинг 50 таси апрель бошига қадар фронт чизиғига етиб келади. Нашрнинг қайд этишича, бу жанговар ҳаракатларга сезиларли таъсир кўрсатишга етмаслиги боис, хавотир уйғотмоқда.

Украинага 14 та Challenger 2 ваъда қилган Буюк Британия биринчи партия доирасида фақат тўртта танкни етказади. Европадаги юқори мартабали амалдорлардан бири бундай қарорни «мантиқан бемаънилик» деб атаган ва оз сонли техникаларни ҳозирги танк блокига бирлаштириш қийинлигини таъкидлаган.

Аввалроқ Буюк Британия ҳукумати Украинага ҳарбий техникалар етказиб берилишини тезлаштиришга ваъда берганди. Мамлакат бош вазири Риши Сунакнинг сўзларига кўра, Британиянинг Challenger 2 танклари Украинага март ойида етказилади. Бош вазирнинг қайд этилишича, ўтган ҳафта Буюк Британияга тажриба ошириш учун келган 10 минг украин ҳарбий хизматчилари Украина ҳудудини ҳимоя қилишда «кейинги ойдан» Challenger 2 танкларидан фойдаланади.

Эслатиб ўтамиз, февраль бошларида АҚШ президенти Жо Байден январь ойида МРБ бошлиғи Уильям Бёрнсга Россия ва Украина тинчлик музокараларини ўтказишга қанчалик тайёрлигини баҳолашни топширгани маълум бўлганди. Шунингдек, Россия яқин 10 кун ичида Украинада кенг кўламли ҳужумни бошлаши мумкинлиги айтилган, АҚШ президенти Украинага 31 та Abrams танкини етказиб беришини эълон қилганди. Кейинроқ Байден Украинага жўнатилиши айтилган 31 та Abrams M1A2 танки камида 2023 йил охирларида Киевга етказиб берилишини айтганди.