Бир гуруҳ журналистлар Россия ҳукуматининг «Россия Федерациясининг Беларусь йўналишидаги стратегик мақсадлари» номли ички ҳужжатини қўлга киритди. Унда Кремль 2030 йилга қадар Беларуснинг сиёсий, иқтисодий ва ҳарбий потенциалини тўлиқ назорат остига олишни режа қилгани келтирилган, деб хабар беради «Досье».

Режани ишлаб чиқариш 2021 йилда амалга оширилган. Ҳужжат 17 варақдан иборат бўлиб, унда Россия ҳукуматининг Беларусдаги сиёсий, мудофаа, савдо ва ижтимоий мақсадлари баён этилган. Улар қисқа муддатли (2022 йилгача), ўрта муддатли (2025 йилгача) ва узоқ муддатли (2030 йилгача) ҳисобланади.

Шундай қилиб, Россия ҳукумати 2030 йилгача Беларусь қонунчилигини ўзлариникига мослаштириш, республиканинг ташқи сиёсатини назорат қилишни ва уни Россия манфаатларидан келиб чиқиб бошқаришни, мамлакатдаги ҳарбийларини кўпайтиришни, ахборот маконида рус ОАВларини кўпайтиришни, рус тилининг беларусь тилидан устуворлигини таъминлашни, шунингдек, «интеграцияга мойил бўлган россияликлар қатламини яратиш мақсадида» Беларусь фуқароларига Россия паспортларини бериш жараёнини соддалаштиришни режа қилган.

Бундан ташқари, Россия ҳукумати Беларусь илм-фан ва таълими орқали ўз таъсир доирасини тарғиб қилмоқчи бўлган. Бунга қадар мамлакат ҳудудида имтиҳон топшириш пунктларини очиш, шунингдек, Могилёв, Гродно ва Виебскда бир нечта маданият марказларини очиш режалаштирилган.

Россия ҳукумати ўз режаларини 1999 йилда Беларусь ва Россия ҳукуматлари ўртасида имозланган иттифоқ шартномаси орқали ҳам амалга оширмоқчи бўлган. У бўйича музокаралар 20 йилга чўзилиб кетганди. 2019 йилда ҳар икки давлат пул-кредит сиёсати ва солиқ қонунчилигига оид иқтисодий масалаларга тааллуқли 28 та иттифоқ дастурини келишишга муваффақ бўлгани эълон қилинганди.

Таъкидланишича, ушбу режаларни ишлаб чиқаришда Россия Қуролли Кучлари Бош штаби, Разведка бош бошқармаси, Ташқи разведка хизмати, Федерал хавфсизлик хизмати ва президент администрацияси бўлими ходимлари иштирок этган.

Журналистлар мазкур ҳужжатларни мустақил экспертларга кўрсатган бўлиб, улар бунинг ҳақиқийга ўхшашини ва унда келтирилган масалаларни жиддий кўриб чиқиш кераклигини тасдиқлаган. «Россиянинг Беларусга нисбатан мақсадлари худди Украинага бўлгани каби, фақат Россия Беларусни урушга эмас, иложсизликка мажбурламоқда», — дейди АҚШнинг OSCE’даги элчиси Майкл Карпентер.

Аввалроқ Лукашенко Украинадаги урушни тугатиш шартини айтганди. Шунингдек, у дунёдаги янги «қурол» номини маълум қилганди. Бундан ташқари, Лукашенко Россияни ядро қуролидан фойдаланишга тайёр бўлишга чақирган. Декабрь охирларида Лукашенко чегарадаги кескинликни зудлик билан камайтириш кучларини нима сабабдан текшириш бошланганини тушунтирганди.