Ўзбекистонда бюджет ва нобюджет ташкилотларда ишловчиларнинг 28 фоизи (1,4 миллион ходим) 1 миллион сўмгача, 24-25 фоизи (1,2 миллион ходим) 1 миллион сўмдан 2 миллион сўмгача, 5,5 миллион сўм ва ундан юқори ҳақ олувчиларнинг сони – 12,9 фоизни (649 минг ходим) ташкил этди. Бу ҳақда Иқтисодиёт ва молия вазирлиги томонидан эълон қилинган давлат буджети даромадларининг 2022 йилдаги ижроси бўйича дастлабки натижаларида маълум қилинган.

Иқтисодиёт ва молия вазирлигининг статистикасида 2020-2022 йилларда республикадаги бюджет ва нобюджет ташкилотлари кесимида иш ҳақи даражаси ҳақида маълумотлар келтириб ўтилган. Унда қайд этилишича, Ўзбекистондаги бюджет ва нобюджет ташкилотларда ишловчи ходимларнинг сони 2022 йилнинг ноябрь ойи ҳолатига кўра, 5 миллион кишини ташкил этмоқда. Бу кўрсаткич 2021 йилда 4,8 миллион кишини ташкил этган.

Аниқланишича, 2022 йилда бюджет ва нобюджет ташкилотларида ишловчи 1,4 миллион нафар ходим 1 миллион сўмгача маош олган. Шунингдек, 1 миллион сўмдан 2 миллион сўмгача ойлик олувчилар сони 2022 йилда 1,2 миллион нафарни ташкил этган. Шу билан бирга, 25,2 фоиз (1,26 миллион) ходим 2 миллион сўмдан 4 миллион сўмгача маош олиши келтириб ўтилган.

Бундан ташқари, бюджет ва нобюджет ташкилотларида ишловчи 467 минг нафар ходим 4,5-5 миллион сўм ҳақ олган бўлса, 649 минг нафар ходим 5,5 миллион сўм ва ундан юқори маош олиши аниқланган. Статистикада келтирилишича, 2022 йилда меҳнатга ҳақ тўлаш фонди 156,9 триллион сўмга етиб, 2021 йилга нисбатан 30,7 триллион сўмга ошган.

Шунингдек, вазирликнинг маълум қилишича, жисмоний шахслардан олинадиган даромад солиғи бўйича тушумлар 2022 йилда 393,3 миллиард сўмни ташкил этиб, 2021 йилга нисбатан 3,4 миллиард сўмга ёки 0,9 фоизга камайган.

Мавзуга доир: Ўзбекистонда 2023 йилда иш ҳақи қанчага ўсиши прогноз қилинди

Аввалроқ Ўзбекистонда иш берувчи маош кечиктирилган ҳар бир кун учун ходимга компенсация тўланиши, Ўзбекистонда ўртача иш ҳақи 2022 йилда қарийб 4 млн сўмга етгани ҳамда Ўзбекистонда натура шаклида иш ҳақи тўланиши мумкинлиги ҳақида хабар берилганди.