Россия президенти Владимир Путиннинг қарийб 2 соат давом этган Федерал мажлисга йиллик мурожаати ўз якунига етди. Meduza Россия етакчиси томонидан айтилган асосий тезисларни бир жойга жамлади.

Владимир Путин Федерал мажлисга мурожаатининг аввалида яна бир марта Ғарб давлатларни Украинадаги урушни бошлашда айблади. Унинг сўзларига кўра, Россия ҳамма нарсани тинч йўл билан ҳал қилиш учун барча ишларни бажарган, бироқ АҚШ ва НАТО «келажакдаги жанговар ҳаракатлар театрини» ташкил этиб, Украинани катта урушга тайёрламоқда.

«Урушни айнан улар бошлаб берган ва биз уни тўхтатиш учун куч ишлатмоқдамиз. Босқичма-босқич, биз ‘махсус ҳарбий операция’ олдида турган вазифаларни аниқ ва изчил бажарамиз», — деди Россия президенти.

Шунингдек, Путин Украинадаги ҳокимият тепасида «неонацистлар» борлигини таъкидлади ҳамда Россия «Украина халқи билан уруш қилмаётганини» айтиб, яна бир бор украиналикларни «Киев режими ва уларнинг Ғарбдаги хўжайинларига бўйсунувчи» эканини қўшимча қилди.

Бундан ташқари, Путин иқтисодиёт ҳақида гапирар экан, Россияда ишсизлик даражаси пасайганини ва ялпи ички маҳсулотнинг 2,1 фоизга «бир оз» пасайишини қайд этди. Унинг таъкидлашича, бугунги кунда «Россия ҳақиқатдан ҳам иқтисодий ривожланишнинг янги циклига ўтмоқда, кўп соҳаларда ютуқ учун барча имкониятлар мавжуд».

Шу билан бирга, Путин ўз нутқи давомида бир қатор таклифларни ҳам илгари сурди. Хусусан, Украинадаги «ҳарбий операция» иштирокчилари учун ҳар олти ойда 14 кунлик таътил белгилаш, ўқиш муддати тўрт йилдан олти йилгача бўлган олий ўқув юртларида асосий кадрлар тайёрлаш тизимига қайтиш ҳамда 2024 йил 1 январдан бошлаб энг кам иш ҳақини 18,5 фоизга ошириш режалаштирилаётганини айтиб ўтди.

Аввалроқ Россия президенти Владимир Путин Федерал мажлисга йиллик мурожаатида унинг мамлакати АҚШ билан имзоланган стратегик ҳужум қуролларини қисқартириш бўйича шартномадан чиқишини айтиб ўтгани ҳақида хабар берилганди.