АҚШнинг Россияда элчиси Линн Трейси 21 февраль куни Россия Ташқи ишлар вазирлигига чақиртирилди ҳамда унга норозилик нотаси топширилди. Бу ҳақда Россия ТИВ хабар берди.

Россия ТИВ хабарида айтилишича, АҚШнинг Москвадаги элчисига топширилган норозилик нотасида Киевга етказиб берилаётган қуроллар, шунингдек, ҳарбий хизматчилар, жумладан, Америка фуқаролари ҳам қонуний нишон эканлиги айтиб ўтилган. Шунингдек, АҚШнинг Украина Қуролли Кучларини қурол-аслаҳа билан таъминланиши, Россия ҳарбий ва фуқаролик инфратузилмасига зарбалар бериш учун нишонларни аниқлашда украиналик ҳарбийларга ёрдам бериши таниқд қилинган.

«Шу муносабат билан элчига Қўшма Штатларнинг Россия билан барча соҳаларда қарама-қаршиликни чуқурлаштириш бўйича амалдаги агрессив курси самарасиз экани айтилди. Вазиятни пасайтириш учун Вашингтон АҚШ-НАТО ҳарбий ва техникасини олиб чиқиб кетиш, шунингдек, Россияга қарши душманона ҳаракатларни тўхтатишни назарда тутувчи чоралар кўриши зарурлиги алоҳида таъкидланди», — дейилади Россия ТИВ хабарида.

Бундан ташқари, Россия томони Қўшма Штатларга «Шимолий оқим 1» ва «Шимолий оқим 2» газ қувурларида содир бўлган портлашлар бўйича тушунтириш бериши ва айбдорларни аниқлаш бўйича текширувга халақит бермаслиги зарурлиги таъкидланган. Шу билан бирга, учрашувда икки томонлама бошқа характердаги қатор масалалар ҳам кўриб чиқилган.

Мавзуга доир: Путин Россия Стратегик ҳужум қуролларини қисқартириш бўйича келишувдан чиқишини маълум қилди

Аввалроқ Россия президенти Мудофаа вазирлигини ядровий қуролларни синовдан ўтказишга тайёрлашга чақиргани, Ғарб давлатлари Украинага 321 та танк етказиб беришн  ваъда қилгани, Буюк Британия Украинада ҳарбий техникалар ишлаб чиқаришни бошлаши мумкинлиги, Украина баҳорги ҳужумга қадар Ғарб давлатлари ваъда қилган танкларнинг чорак қисмини олиши ҳақида хабар берилганди.