Россияда сафарбарликнинг янги тўлқини доирасида университетларнинг кундузги бўлимларида таҳсил олувчи талабалар Украинадаги урушга оммавий сафарбар қилинишга тайёрланмоқда, дея хабар берди Украина Мудофаа вазирлигининг Бош разведка бошқармаси.

«Бунинг учун ҳарбий рўйхатга олиш ва рўйхатга олиш бўлимларига кундузги бўлим талабаларига чақирув қоғозларини топширишда ёрдам берадиган ‘огоҳлантириш пунктлари’ яратилмоқда», дейилади Украина разведкаси баёнотида.

Украина Мудофаа вазирлигининг Бош разведка бошқармаси ушбу маълумотларга аниқлик киритиш мақсадида Томск давлат педагогика университети раҳбариятига тегишли бўлган 9 февралдаги буйруқнинг нусхасини эълон қилди. Ҳужжатда «огоҳлантириш жойлари»да ишлаш учун маълум миқдордаги талабалар ва ходимларни ажратиш талаби келтириб ўтилган. Шунингдек, «огоҳлантириш пунктлари» таркибига киритиш муайян талабалар ва ходимларнинг розилигисиз ёки ҳатто олдиндан эълон қилинмаган маълумотларсиз содир бўлиши айтилган.

Бундан ташқари, Украина разведкаси Новосибирск педагогика университети ва Томск политехника университети ходимлари ҳам худди шундай буюртмалар олишганини маълум қилган.

Разведка маълумотларига кўра, Россияда навбатдаги сафарбарлик тўлқини қўшимча қонуний асосларни талаб қилмаслиги мумкин. Сафарбарликнинг эҳтимолий санаси сифатида 1 апрелгача бошланиши айтилган.

Эслатиб ўтамиз, Россия президенти Владимир Путин 21 сентябрь куни мамлакатда қисман ҳарбий сафарбарлик эълон қилган эди. Сафарбарлик эълон қилиниши фонида мамлакатни оммавий тарк этишлар ортиб кетган ва бунинг оқибатида қатор шаҳарларга авиарейслар учун чипталар тугаб қолганди. Бундан ташқари, Кремль Россияда сафарбарликнинг «иккинчи тўлқини» бошланганини рад этгани ҳақида хабар берилганди.