Тошкент шаҳри Мирзо Улуғбек ва Чилонзор туманларидаги баъзи жойларда газ таъминоти вақтинча тўхтатилди, дея хабар қилди Энергетика вазирлиги.

Хусусан, Мирзо Улуғбек тумани «Мевазор» МФЙ ҳудудидан ўтган ер ости юқори босимли газ қувурида газ сизиб чиқиши аниқланган ва ҳолатни бартараф этиш ишлари олиб борилмоқда. Шу сабабли 21 февраль куни соат 10:00 дан 17:00 га қадар туманнинг қуйидаги истеъмолчиларида табиий газ таъминоти вақтинча тўхтатилган.

Шундан аҳоли истеъмолчилари:

• «Мевазор» МФЙдаги 122 та уй хўжалигида;
• Геологлар кўчасидаги 149 та уй хўжалигида;
• Гулзор кўчасидаги 150 та уй хўжалигида;
• Тонг кўчасидаги 148 та уй хўжалигида;
• Узумзор кўчасидаги 151 та хўжалигида;
• Минг ўрик кўчасидаги 139 та хўжалигида;
• Олмазор кўчасидаги 158 та уй хўжалигида.

Улгуржи истеъмолчилар:

• «Мевазор» МФЙдаги 3 та;
• Геологлар кўчасидаги 3 та;
• Гулзор кўчасидаги 3 та;
• Тонг кўчасидаги 2 та;
• Узумзор кўчасидаги 1 та;
• Минг ўрик кўчасидаги 4 та;
• Олмазор кўчасидаги 7 та.

Шунингдек, Чилонзор тумани «Лутфий» МФЙ Лутфий кўчаси 93−94-уйлар оралиғидаги ер ости ўрта босимли газ қувурида газ сизиб чиқиши аниқланган ҳамда ҳолатни бартараф этиш ишлари режалаштирилган.

Шу сабабли 21 февраль куни соат 11:00 дан 18:00 га қадар туманнинг қуйидаги истеъмолчиларида табиий газ таъминоти вақтинча тўхтатилди.

Шундан аҳоли истеъмолчилари:

• «Лутфий» МФЙдаги 378 та уй хўжалигида ҳамда 2 та кўп қаватли уйдаги жами 98 та аҳоли хонадонида;
• «1-Қатортол» МФЙдаги 356 та уй хўжаликларида ва 2 та кўп қаватли уйдаги жами 128 та аҳоли хонадонида;
• «Нафосат», «Диёр» МФЙлардаги 58 та кўп қаватли уйдаги жами 2298 та аҳоли хонадонида;
• «Қатортол» ва «Чўпон ота» МФЙлардаги 48 та кўп қаватли уйдаги 1896 та аҳоли хонадонида;
• «Боғзор», «Оқтепа» МФЙлардаги 64 та кўп қаватли уйдаги 2682 та аҳоли хонадонида.

Таъмирлаш ишлари якунлангач табиий газ таъминоти қайта тикланиши қайд этилган.

«Истеъмолчилар барча газ жиҳозларни ўчириб қўйишларини, шу билан бир қаторда табиий газдан фойдаланишда техник қоидаларга амал қилишларини сўраймиз. Зарурат туғилганда 1104 қисқа рақами ёки 104 диспетчерлик хизмати билан боғланиш мумкин. Етказилаётган ноқулайликлар учун истеъмолчилардан узр сўраймиз», дейилади вазирлик хабарида.

Аввалроқ Тошкентдаги 5 мингта хонадонда газ таъминоти вақтинча тўхтатилгани тўғрисида хабар берилганди. Шунингдек, Туркманистон юборган бепул суюлтирилган газ Ўзбекистонга етиб келгани, Ўзбекистон 2022 йилда Хитойга 1 млрд долларлик газ сотгани маълум бўлганди.