Туркия жанубидаги Ҳатай вилоятида яна иккита зилзила содир бўлди. Бу ҳақда мамлакат Фавқулодда вазиятлар оқибатларини бартараф этиш бошқармаси (AFAD)га таяниб Anadolu агентлиги хабар берди.

Туркия ички ишлар вазири Сулаймон Сойлунинг маълум қилишича, зилзила оқибатида камида 3 киши ҳалок бўлган, 213 киши турли жароҳатлар билан шифохоналарга ётқизилган. Унинг сўзларига кўра, ҳозирда қулаб тушган учта бино ҳудудида қидирув-қутқарув ишлари олиб борилмоқда.

Биринчи ер ости силкиниши маҳаллий вақт билан соат 20:04 да қайд этилган — 6,4 балл, иккинчиси соат 20:07 да содир бўлган — 5,8 балл. Зилзила эпицентрлари мос равишда Дефне ва Самандағ туманларида жойлашган.

Биринчи зилзила ўчоғи 16,7 километр, иккинчиси эса 7 километр чуқурликда жойлашган. Зилзила кучи Сурия, Ливан, Иордания, Ироқ, Фаластин ва Исроилнинг қўшни вилоятларида ҳам сезилган. Суриянинг Идлиб, Ҳалаб, Хом каби қатор вилоятлари аҳолиси ваҳимада кўчаларга югуриб чиққан, бир қанча иншоотлар қулаб тушган.

Ливанда ер ости силкиниши бутун мамлакат бўйлаб, жумладан, пойтахт Байрутда ҳам сезилган. AFAD фуқароларни денгиз сатҳи 50 сантиметрга кўтарилиши мумкинлиги сабаб соҳилдан узоқроқда бўлишга чақирган.

Туркия вице-президенти Фуат Октай аҳолидан зарар етган биноларга яқинлашмасликни сўраган. Маълумотларга кўра, 6,4 балли зилзиладан кейин Дефне туманида 32 та афтершок қайд этилган. Искандарун шаҳрида бўш уч қаватли бино қулаган, Антакия марказидаги яна иккита иншоотга зарар етган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Туркия вице-президенти Фуат Октайнинг айтишича, зилзилаларда инсонларнинг оммавий ҳалок бўлишида айбдор дея гумонланаётган камида 113 кишини ҳибсга олишга ордер берилган. Тергов давомида бир неча киши ҳибсга олинган. 11 февраль куни Истанбул аэропортида Меҳмет Яшар Кошкун ушланганди — у зилзила вақтида бутунлай қулаб тушган 12 қаватли турар жой биносининг қурилиши билан шуғулланган пудратчидир. Anadolu агентлиги маълумотларига кўра, у Черногорияга учиб кетмоқчи бўлган. Мазкур аэропортда 12 февраль куни Явуз Каракуш исмли яна бир пудратчи рафиқаси билан қўлга олинган, улар Грузияга учмоқчи бўлган.