Украинада уруш бошланганида Ғарб давлатлари ва ташкилотлари мамлакатга 64 миллиард евро ажратишни ваъда қилганди, бироқ 2022 йил охирига келиб Киев ушбу маблағларнинг яримидан камини — 31 миллиард евро олган. Бу ҳақда Кил институтининг жаҳон иқтисодиёти бўйича тадқиқотлари натижасига таяниб The Financial Times хабар берди.

Институт илмий ходими Кристофер Требешнинг айтишича, Европа Иттифоқига жанговар ҳаракатлар бошланганидан кейин маблағларнинг бир қисмини ажратиш бўйича сиёсий ва юридик розилик олишига салкам ярим йил вақт керак бўлган. Унинг таъкидлашича, ҳарбий можаронинг актив фазаси бўлиб турган, харажатлар ортиб, даромадлар камайиб кетган бир вақтда «бу шубҳасиз муаммо ҳисобланади».

Таҳлилчилар хулосасида қайд этилишича, Ғарб давлатлари олдинлари шу каби можароларда ёрдам учун сезиларли даражада кўп маблағ ажратиб келган. Масалан, 1990–1991 йилда Форс кўрфазидаги уруш вақтида Германия иттифоқчиларни қўллаб-қувватлашга ЯИМнинг 0,5 фоизини йўналтирган, бу ҳозирда Берлин Киевга ваъда қилган маблағлардан уч баробар кўп демак.

«Ўтган даврга нисбатан бу нақадар камлигини билиб ҳайратда қолдим, чунки ҳозирда давлатлар олдингидан анча бой ва иқтисодий жиҳатдан қудратли… Агарда биз хоҳласак, бундан ҳам кўпроқ ёрдам бера оламиз», — дейди Требеш.

Европа Иттифоқи ва Европа инвестиция банки 2022 йилда 30 миллиард евро ажратишга келишиб олганди, аммо ушбу маблағларнинг 17,5 миллиарди Киевга етиб бормаган. Ноябрь ойида Европа Иттифоқи тўловлар механизмини қайта кўриб чиққан ва 2023 йилда Украинага ҳар ой 1,5 миллиард евро берилишини маълум қилган.

Украина Молия вазирлигига кўра, мамлакат учун хорижлик шерикларидан ҳар ойда 3 миллиард доллар талаб этилади. Вазир ўринбосари Ольга Зикованинг айтишича, ҳужумат бюджет дефицитини камайтириш бўйича тизимли ишларни амалга оширган, АҚШ ва Европа Иттифоқи эса йил давомида 30 миллиард доллар миқдорида молиялаштиришни тақдим этишга тайёрлигини тасдиқлаган.

Аввалроқ Байден Украинага 500 миллион долларлик янги ҳарбий ёрдам пакетини эълон қилганди. Феварль бошида АҚШ ҳукумати Украинага 2,2 миллиард долларлик янги ҳарбий ёрдам пакетини тайёрламоқда. Унинг ичидан узоқ масофага мўлжалланган ракеталар ўрин олиши тўғрисида хабар берилганди. Гап Boeing ва Saab Group компаниялари томонидан ишлаб чиқарилган GLSDB (Ground Launched Small Diameter Bomb) ракеталари ҳақида кетмоқда. Улар 150 километр узоқликка парвоз қила олади.