Украина ташқи ишлар вазири Дмитрий Кулеба мамлакат икки фронтда катта жангга тайёргарлик кўраётганини маълум қилди, деб хабар беради TCH телекомпанияси.

Вазирнинг фикрича, биринчи фронт — дипломатик, иккинчиси — ҳарбий.

Кулеба яқин вақтлар ичида НАТО шарқий қаноти давлатлари етакчиларининг учрашуви бўлиб ўтиши ва унда Украинани қўллаб-қувватлаш бўйича муҳим қарорлар қабул қилиниши мумкинлигини айтган.

«Ҳозирда барча дўстларни, Украинага ростдан ёрдам бера оладиганларни максимал даражада сафарбарликка жалб этиш керак», — дейди вазир.

Украина дипломатияси мамлакатга Литва, Ирландия ва Польшадан еттита автотрансформатор, Германия, Норвегия ва Испаниядан 543 та генератор, Финляндиядан 24 та, Озарбайжондан 44 та трансформатор, Исорилдан эса 19 та кучли генераторни етказиб бериш борасида келишувга эришган.

Бундан олдин Кулеба Хитой Украинадаги можарода воситачи сифатида Россия учун тўхтатувчи омил бўлиб хизмат қилиши мумкинлигини айтганди.

«Хитой Россия билан ўртасида юзага келган муносабатлар сабаб унинг тажовузкор ҳаракатларини тўхтатишда муҳим роль ўйнаши мумкин», — деган у Хитой ташқи ишлари вазири Ван И билан учрашувда. Кулебанинг сўзларига кўра, ҳудудий яхлитлик — бу Хитой учун ҳам, Украина учун ҳам асосий тамойилдир.

Эслатиб ўтамиз, аввалроқ АҚШ президенти Жо Байден Киевга ташриф буюргани ҳамда Владимир Зеленский Россия ҳужуми бошланганидан бери биринчи марта хорижий сафарини амалга оширгани ҳақида хабар берилганди. Шуниингдек, Байден администрацияси Украинани қарши ҳужумни кечиктирмасликка чақиргани ҳақида хабар берилганди.