АҚШ Украинага Boeing компанияси томонидан ишлаб чиқарилган узоқ масофага мўлжалланган GPS-навигаторлари (72 километрдан ортиқ) бор Jdam-ER бомбаларини топширади, деб хабар беради Bloomberg.

Пентагон Киев учун декабрь ойида эълон қилган ҳарбий ёрдам пакети доирасида «юқори аниқликдаги авиация ўқ-дорилари» етказилишини маълум қилганди, аммо айнан қайси турдалигига аниқлик киритмаган. Идора вакили Келли Флиннинг айтишича, АҚШ хавфсизлик нуқтаи назаридан юбориладиган жанговар ўқ-дориларга оид батафсил маълумотларни ошкор қилмайди.

Jdam-ER бомбаларидан АҚШ Ҳарбий-ҳаво кучлари ва Ҳарбий-денгиз кучлари фойдаланиб келади, шунингдек, улар дунёнинг 26 давлатига сотилган. Jdam-ER’ни 220 дан 900 килограммгача бўлган бошқарилмайдиган бомбаларга ўрнатилиши мумкин, натижада улар бошқариладиган бомбаларга айланади. Бомба ташланганидан кейин «қанотини ёяди», бу эса унинг парвози узоқлигини уч баробарга оширади. Узоқ масофага мўлжалланган Jdam-ER Австралия Ҳарбий-ҳаво кучлари билан ҳамкорликда яратилган.

20 январь куни Boeing АҚШ Ҳарбий-ҳаво кучларидан Jdam-ER’ни ишлаб чиқариш бўйича 40,5 миллион долларлик буюртма олган. Ишлар 30 июнгача якунланиши керак. Bloomberg маълумотларига кўра, бу АҚШ ва Украина совет даврига тегишли қирувчиларни Jdam-ER’ни учиришга қодир усулни ишлаб чиққанидан далолат беради.

Эслатиб ўтамиз, февраль бошида АҚШнинг Украинага ажратадиган янги ҳарбий ёрдам пакетидан Boeing ракеталари ўрин олиши маълум бўлганди. Уларнинг хариди учун 200 миллион доллардан ортиқ маблағ ажратилган, етказиб бериш эса 9 ойга яқин вақтни олади. 20 февраль куни Польшага ташрифи доирасида Киевга келган АҚШ президенти Жо Байден Украинага янги 500 миллион долларлик ҳарбий ёрдам пакетини эълон қилган.