Хайрли кеч, ушбу ўқиб турганингиз — «Бугун»нинг энг сара ва муҳим хабарлари жой олган «Бугун оқшоми» дайжести.

Тошкентда жамоат жойларида фуқароларга тамаки чекиш билан боғлиқ диний ёндашувларни тушунтирган эркак 6 млн сўм жаримага тортилди

Тошкентда жамоат жойларида фуқароларга тамаки чекиш билан боғлиқ диний ёндашувларни ва тушунтиришларни уқтираётган 1999 йилда туғилган эркак қўлга олинди. Аниқланишича, фуқаро А.Х. тамаки чекиш билан боғлиқ диний ёндашувлар ҳақида тушунтириш олиб борган шахсларни танимаслигини, уларга тамакига нисбатан муносабатини ўз ташаббусига кўра, шахсий диний қарашларидан келиб чиққан ҳолда билдирганлигини айтган. Пойтахт ИИББнинг маълумотларига кўра, айбланувчига ушбу ҳолат юзасдидан суд идоралари томонидан Маъмурий жавобгарлик тўғрисидаги кодекснинг 184-моддасига (Диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш) асосан, БҲМнинг 20 баробари миқдорида жарима жазоси тайинланган.

Ўзбекистонда ишсизлик даражаси 9 фоизга қисқарди

Камбағалликни қисқартириш ва бандлик вазири Беҳзод Мусаевнинг айтишича, Ўзбекистонда ҳоким ёрдамчилари фаолияти йўлга қўйилиши натижасида 2 миллион 200 минг нафар ишсиз фуқаронинг бандлиги таъминланган. Шунингдек, республикада ишсизлик даражаси 8,9 фоизга туширилган. Қашшоқлик даражаси кўрсаткичи эса 17 фоиздан 14,1 фоизга камайган. Ўзбекистонда қашшоқлик даражасини 12 фоизгача камайтириш режалаштирилган.

Бундан ташқари, бугунги кундан Ўзбекистон бўйича меҳнатга лаёқатли аҳолининг 1,3 миллиони ишсиз қолмоқда.

Жиззахда эр-хотин ҳаммомда ис газидан заҳарланиб вафот этди

Жиззах вилояти Шароф Рашидов туманида 41 ёшли эркак ва унинг хотини 9 февраль куни соат 22:00 лар атрофида ювиниш хонасига кирган ва тонгги соат 08:00 гача қайтиб чиқмаган. Натижада ушбу ҳолатдан ҳавотирланган оиланинг 2 нафар ўғли ота-онасидан хабар олиш учун ҳаммомга кирган ва уларни жонсиз ҳолатдалигини гувоҳи бўлишган.

Ушбу ҳолат юзасидан Туман газ таъминоти корхонаси раҳбари ўринбосарининг маълум қилишича, эр-хотиннинг ўлимига ис газидан заҳарланиш сабаб бўлмаган. Бироқ туман ҳокими ёрдамчиси воқеага ис гази сабаб бўлганини айтиб ўтган.

Блогер Абдуқодир Мўминовнинг тергов вақтида вафот этгани рад этилди

Етмиш минг доллар талаб қилгани сабабли Жиноят кодексининг тегишли моддаларидаги жиноятларни содир этганликда гумонланиб, ҳибсга олинган блогер Абдуқодир Мўминовнинг тергов вақтида қийнаб ўлдирилгани ҳақида хабарлар тарқалди. Бош прокуратуранинг маълум қилишича, Абдуқодир Мўминовнинг вафоти ҳақида тарқалаётган хабарлар асоссиз. Бундан ташқари, Абдуқодир Мўминовнинг собиқ адвокатининг айтишича, айни пайтда айбланувчи соппа-соғ.

Адвокатнинг сўзларига кўра, Абдуқодир Мўминов ҳаммага шубҳа билан қараяпти. Шу сабабли, унинг хизматларидан воз кечган.

Ўзбекистонда 243 та қонунчилик ҳужжатида коррупциявий омил аниқланди

Ўзбекистонда 2022 йилда экспертизадан ўтказилган қонунчилик ҳужжатларининг 243 тасида 350 та коррупциявий омил аниқланди. Экспертиза натижаларига кўра, 2022 йил давомида тескҳирувдан ўтказилган ижтимоий ҳимоя, молия ва банк, тадбиркорлик, ташқи иқтисодий фаолият ҳамда божхона ишига оид 1860 та қонунчилик ҳужжатларида 350 та коррупциявий омил аниқланган.

Бундан ташқари, аниқланишича, давлат органлари ва ташкилотлари томонидан экспертизадан ўтказилган ва уларда коррупциявий омиллар аниқланмагани маълум қилинган 293 та лойиҳа длия вазирлиги томонидан экспертизадан ўтказилганда 457 та коррупциявий омил аниқланган.

Шунингдек, бошқа хабарлар:

1. Ўзбекистон ва Миср «яшил» энергетика ва тўғридан-тўғри авиақатновларни амалга оширишга келишиб олди;
2. «АҚШ Украинага GPS тизимлари бор Jdam-ER бомбаларини юборади» — Bloomberg;
3. «Хитой Москвадан узоқлашишга уринмоқда» — NYT

Хўш, дунёда нима гап?

АҚШ собиқ президенти Дональд Трамп Байден Украинани қўллаб-қувватлаётгани сабаб учинчи жаҳон уруши юз бериши мумкинлигини тахмин қилди

Трампнинг таъкидлашича, учинчи жаҳон урушининг юз бериши ҳеч қачон ҳозиргидек яқин бўлмаган. Унинг сўзларига кўра, Қўшма штатларнинг амалдаги президенти Жо Байден Украинани қўллаб-қувватловчи ҳаракатлари билан дунёни янги жаҳон уруши сари ундамоқда.

«Байден тизимли, балки онгсиз равишда, бизни Учинчи жаҳон уруши томон етакламоқда», — дейди Трамп.

Бундан ташқари, Дональд Трамп яна бир марта президенликни қўлга киритганидан кейин Оқ уй, давлат ичидаги, Пентагон, Давлат департаментини урушни қўллаб-қувватлаётганлардан тозалашга ваъда берган.

Владимир Путин Москвада ўтказилган «ватанпарварлик руҳидаги» концертда иштирок этди

Россия президенти Владимир Путин Федерал мажлисга йиллик мурожаатидан бир кун ўтиб Москвадаги «Лужники» стадионида «ватанпарварлик руҳида» ўтказилган концертда иштирок этди. Россия президенти анъанага мувофиқ сўзининг аввалида Украинадаги урушга тўхтатилиб ўтди ҳамда йиғилганларни Ватан ҳимоячилари куни билан табриклашдан бошлади. Путиннинг айтишича, ҳарбий ҳаракатлар олиб борилаётган ҳудудлар Россиянинг азалий ерлари. Шунингдек, Путининг таъкидлашича, бугунги кунда Украинадаги «махсус ҳарбий операция»ни мамлакатнинг бутун аҳолиси қўллаб-қувватламоқда. Россия президентининг бу галги нутқи олдингиларига қараганда анча қисқа бўлди. Путин мамлакат мадҳияси янграганидан кейин стадионни тарк этган.

Бугун билан яшанг. «Бугун»да қолинг.