Ғарб ва Украина Путиннинг Федерал мажлисга мурожаатини танқид қилди
Россия президенти Владимир Путиннинг Федерал Мажлисга мурожаати Ғарб ва Украина томонидан танқид қилинди, деб ёзади Deutsche Welle.
АҚШ президентининг миллий хавфсизлик бўйича маслаҳатчиси Жейк Салливан Путиннинг Ғарб борасидаги айбловини «бемаънилик» деб атаган. «Ҳеч ким Россияга ҳужум қилмади. Россияга Украина ёки бошқа бирор томондан ҳарбий таҳдид мавжудлиги борасида шунақа бемаъни тасаввур бор», — дейди Салливан.
Унинг таъкидлашича, Россия Украинадаги жангни тўхтатиб, уйига йўл олса, уруш тугайди. Агарда Украина жанг қилишдан тўхтаса, Қўшма Штатлар ҳамда коалиция унга ёрдам бермай қўйса, ушбу мамлакат дунё харитасидан ўчиб кетади.
Ўз навбатида НАТО бош котиби Йенс Столтенберг Россиянинг бир томонлама тартибда Стратегик ҳужум қуроллари тўғрисидаги шартномасидан чиқишидан афсусда эканини билдириб, Владимир Путинни «ўз қарорини қайта ўйлаб кўришга» чақирган.
АҚШ давлат котиби Энтони Блинкен ҳам Россия қарорини қоралаган. Унинг айтишича, бу «энг юқори афсусга лойиқ ва масъулиятсизликдир». «Биз Россия аслида нима қилаётганини диққат билан кузатиб борамиз», деб ваъда беран у Афинага ташрифи чоғида.
Германияда Путиннинг Россиянинг шартномадаги иштирокини тўхтатиб қўйиш нияти ҳақидаги сўзлари Москва томонидан кескинлашувнинг навбатдаги раундининг белгиси сифатида қабул қилинган. Германия ташқи ишлар вазири Анналена Бербок Туркияга ташрифи чоғида халқаро ҳамжамият Россия президенти Владимир Путинни Украинадаги уруш юзасидан Ғарб билан қарама-қаршиликда ядровий таҳдидларга йўл қўймасликка бир неча бор чақирган.
Украина президенти офиси раҳбарининг маслаҳатчиси Михаил Подоляк Reuters агентлигига берган интервьюсида Путин «реаллик билан алоқани бутунлай йўқотганини» таъкидлаган. «У адолат ва халқаро ҳуқуқ борасида диалог олиб боришнинг имкони бўлмаган умуман бошқа реалликда яшаяпти», — деган Подоляк.
Мавзуга доир: Трамп президентлик сайловида ғалаба қозонса, дарҳол Путин ва Зеленскийга қўнғироқ қилишга ваъда берди
Аввалроқ АҚШ президенти Жо Байден Киевга ташриф буюргани ҳақида хабар берилганди. Байден Украинада бўлиб турган пайти Америка разведка самолётлари, жумладан, ҳаво радарлари билан жиҳозланган E-3 Sentry ва C-135W Rivet Joint электрон бошқариладиган самолётлар Польша ҳаво ҳудудидан Киевни мунтазам равишда кузатиб турган. Айнан АҚШ етакчисининг Киевга ташрифи пайтида бутун Украина бўйлаб ҳаво тревогаси эълон қилинган. Бироқ Россия томони ракета ёки авиация билан мамлакат ҳудудига зарба бермаган. Шунингдек, АҚШ президенти Жо Байден Варшавада Украинани қўллаб-қувватлаб, нутқ сўзлаган.
