Истанбулда табиий офатдан жабр кўрган 9653 кишига шифохоналардан рухсат берилди, ҳозирда 1214 киши даволанишни давом эттирмоқда, деб хабар беради Anadolu агентлиги.

Зилзилалардан жабрланган фуқаролар Истанбулга Туркия Ҳаво кучларининг ҳарбий-транспорт ҳамда Соғлиқни сақлаш вазирлигининг самолётлари ёрдамида олиб келинган. Аэропортда улар хусусий ва давлат шифохоналарига, шунингдек, ОТМлар ҳузуридаги тиббиёт муассасаларига тақсимланган.

Умумий ҳисобда зилзилалар бошланганидан бери Истанбулга 10 867 нафар ярадор олиб келинган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Туркия вице-президенти Фуат Октайнинг айтишича, зилзилаларда инсонларнинг оммавий ҳалок бўлишида айбдор дея гумонланаётган камида 113 кишини ҳибсга олишга ордер берилган. Тергов давомида бир неча киши ҳибсга олинган. 11 февраль куни Истанбул аэропортида Меҳмет Яшар Кошкун ушланганди — у зилзила вақтида бутунлай қулаб тушган 12 қаватли турар жой биносининг қурилиши билан шуғулланган пудратчидир. Anadolu агентлиги маълумотларига кўра, у Черногорияга учиб кетмоқчи бўлган. Мазкур аэропортда 12 февраль куни Явуз Каракуш исмли яна бир пудратчи рафиқаси билан қўлга олинган, улар Грузияга учмоқчи бўлган. Мамлакатда зилзилалар қурбонлари сони 41 минг кишидан ошган.

20 февраль куни Туркия жанубидаги Ҳатай вилоятида яна иккита зилзила содир бўлди. Туркия ички ишлар вазири Сулаймон Сойлунинг маълум қилишича, зилзила оқибатида камида 3 киши ҳалок бўлган, 213 киши турли жароҳатлар билан шифохоналарга ётқизилган.