Ўзбекистонда 2022 йилда экспертизадан ўтказилган қонунчилик ҳужжатларининг 243 тасида 350 та коррупциявий омил аниқланди. Бу ҳақда Адлия вазирлиги маълум қилди.

Қайд этилишича, 2022 йил давомида ижтимоий ҳимоя, молия ва банк, тадбиркорлик, ташқи иқтисодий фаолият ҳамда божхона ишига оид 1860 та қонунчилик ҳужжати коррупцияга қарши экспертизадан ўтказилган. Экспертиза натижаларига кўра, ҳужжатларда 350 та коррупциявий омил аниқлаyган.

Давлат органлари ва ташкилотлари томонидан 293 та лойиҳа коррупцияга қарши экспертизадан ўтказилган ва уларда коррупциявий омиллар аниқланмагани маълум қилинган. Лекин ушбу лойиҳалар Адлия вазирлиги томонидан экспертизадан ўтказилганда уларда 457 та коррупциявий омил аниқланган.

Бундан ташқари, вазирлик томонидан 2022 йилда 280 та лойиҳа ҳамда 18 та амалдаги қонунчилик ҳужжати тартибга солиш таъсирини баҳолашдан ўтказилган.

Мазкур жараён давомида лойиҳаларнинг 136 таси уни ишлаб чиққан вазирлик ва идоралар томонидан тартибга солиш таъсирини баҳолашдан ўтказилмагани, 144 таси бўйича тўлдирилган ҳисоботлар талаб даражасида эмаслиги аниқланиб, тегишли хулосалар берилган.

Шунингдек «Коррупциядан холи қонунчилик»ни яратиш мақсадида 2026 йилга қадар амалдаги 21 мингга яқин қонунчилик ҳужжатлари коррупцияга қарши экспертизадан ўтказилиши таъкидланган.

Аввалроқ Антикоррупция агентлиги ҳокимликлар тадбиркорларнинг машиналардан фойдаланаётганига муносабат билдиргани, Ўзбекистон ССВ тизимида 2023 йил «Коррупцияга қарши кураш йили» деб эълон қилингани тўғрисида хабар берилганди. Шунингдек, Ўзбекистонда 2022 йилда коррупция ҳақида хабар берган қанча одам мукофотлангани маълум қилинган эди. Унга кўра, Бош прокуратура томонидан 2022 йилда жами 68 нафар шахс коррупцияга оид ҳуқуқбузарлик ҳақида хабар бергани ёки коррупцияга қарши курашишга бошқа тарзда кўмаклашгани сабабли рағбатлантирилган. Шунидан, 68 нафар шахснинг 22 нафарига пул мукофоти, 42 нафарига ташаккурномалар ва 4 нафарига эса эсдалик совғалар топширилган.