Ўзбекистонда бугунги кунда меҳнатга лаёқатли аҳолининг 1,3 миллион нафари ишсиз экани маълум бўлди. Бу ҳақда камбағалликни қисқартириш ва бандлик вазири Беҳзод Мусаев айтиб ўтди.

Вазирнинг маълум қилишича, ҳоким ёрдамчилари фаолияти йўлга қўйилиши натижасида республика бўйича 2 миллион 200 минг нафар ишсиз фуқаронинг бандлиги таъминланган.

«Мамлакатимизда камбағалликни камайтириш ва бандликни таъминлаш бўйича мутлақо янги тизим — ҳоким ёрдамчилари институти ташкил этилди. Ҳозирда республикадаги мавжуд маҳаллаларда 10 минг нафарга яқин ҳоким ёрдамчилари фаолият юритиб, улар тадбиркорликни ривожлантириш бўйича хизмат кўрсатмоқда», — деди камбағалликни қисқартириш ва бандлик вазири Беҳзод Мусаев.

Беҳзод Мусаевнинг сўзларига кўра, юқорида айтилган ишларнинг бажарилишига қарамасдан Ўзбекистон бўйича бугунги кунда меҳнатга лаёқатли аҳолининг 1,3 миллион нафари ишсизлигича қолмоқда.

Шунингдек, маълумотларга кўра, республикада ишсизлик даражаси 8,9 фоизга туширилган. Қашшоқлик кўрсаткичи эса 17 фоиздан 14,1 фоизга камайган. Бундан ташқари, 2023 йилда барча имкониятлар ишга солиниб, Ўзбекистонда қашшоқлик даражасини 12 фоизгача камайтириш режалаштирилаётгани маълум қилинган.

Аввалроқ Шавкат Мирзиёев республикада камбағаллик қисқартирилиб, аҳоли даромади кўпайтирилиши ҳақида айтганди. Шунингдек, Ўзбекистонда камбағаллик чегараси белгилангани ҳақида хабар берилганди.