Ўзбекистоннинг ҳарбий-саноат маҳсулотлари биринчи марта Абу-Даби (БАА)даги IDEX—2023 кўргазмасида намойиш этилди.

Қайд этилишича, 2023 йилнинг 20–24 февраль кунлари Абу-Даби (БАА)даги ADNEC Миллий кўргазмалар марказида XVI IDEX—2023 кўргазмаси бўлиб ўтмоқда, унда 65 мамлакатдан 1350 та етакчи компания иштирок этмоқда.

Хусусан, кўргазмада Ўзбекистон номидан мустақиллик йилларидан бошлаб ишлаб чиқаришни йўлга қўйган Тошкент вилояти Чирчиқ шаҳрида жойлашган VPK AKSUM маҳаллий ҳарбий-саноат компанияси томонидан ишлаб чиқарилган енгил зирҳли техникалар намойиш этилмоқда.

Хабарга кўра, кўргазма дастури доирасида 21 февраль куни VPK AKSUM компанияси томонидан тақдим этилган AKSUM MAX S ва AKSUM MAX DS енгил зирҳли автомашиналари намуналарининг кўргазмали чиқишлари бўлиб ўтган.

Маълумот учун, Кўргазма қурол ва хавфсизлик технологиялари бўйича энг нуфузли халқаро кўргазмалардан бири бўлиб, Абу-Дабида 1993 йилдан бери ҳар 2 йилда бир марта ўтказиб келинади.

Шунингдек, IDEX БАА президенти Шайх Халифа бин Зоид Ол Наҳаён ҳомийлигида, ҳукумат ва мамлакат қуролли кучлари кўмагида ўтказилади. Мазкур кўргазма жаҳоннинг етакчи ҳарбий техника ишлаб чиқарувчиларига кириш имконини берувчи, халқаро делегациялар ташриф буюрадиган ва жаҳон оммавий ахборот воситаларида ёритилишини таъминловчи етакчи платформадир. IDEX кўргазмасининг асосий профиллари — қуроллар, электрон ҳимоя воситалари, баллистик тизимлар, радар қурилмалари, телекоммуникациялар, оптик электроника, ўқ-дорилар, ҳарбий техника, миналарга қарши тизимлар, ер, сув ва ҳаводаги ҳимоя тизимлари, муҳандислик иншоотлари, махсус жиҳозлар.