Москвадаги «Лужники» стадионида 22 февраль куни Владимир Путин иштирокида навбатдаги «ватанпарварлик руҳидаги» концерт бўлиб ўтди. Meduza нашри Россия президенти томонидан стадионда айтилган сўзларни бир жойга жамлади.

Россия президенти анъанага мувофиқ сўзининг аввалида Украинадаги урушга тўхтатилиб ўтди ҳамда йиғилганларни Ватан ҳимоячилари куни билан табриклашдан бошлади. Путиннинг айтишича, ҳарбий ҳаракатлар олиб борилаётган ҳудудлар Россияга тегишли.

«Сизларни яқинлашиб келаётган байрам — Ватан ҳимоячилари куни билан табриклайман. Бугун биз ‘махсус ҳарбий операция’ доирасида бу ерда байрам тадбирига йиғилганмиз. Ҳозир тарихий чегараларимизда халқимиз учун кураш кетмоқда. Уни худди шу ерда, ёнимизда турганлар каби жасур жангчилар ҳимоя қилмоқда. Улар мардона, қаҳрамонона, мардлик билан курашадилар. Биз улар билан фахрланамиз ва улар шарафига уч марта ‘Ура’ деб айтамиз. Улар бизнинг саломимизни эшитишлари керак», — деди Путин.

Шунингдек, Путининг таъкидлашича, бугунги кунда Украинадаги «махсус ҳарбий операция»ни мамлакатнинг бутун аҳолиси қўллаб-қувватламоқда.

«Бугунги кунда уларни бутун мамлакат қўллаб-қувватламоқда, демак, бу ишни қилаётган ҳар бир киши маълум даражада ватан ҳимоячисидир. Булар бизнинг жангчиларимизнинг оёққа туришларига ёрдам берадиган тиббиёт ходимлари: шифокорлар, ҳамширалар ва энагалар, албатта, булар транспорт сектори, мудофаа сектори ходимлари ва барчангиз бугун жангчиларимизни қўллаб-қувватлаш учун келгансиз. Булар ҳатто жангчиларимизни қўллаб-қувватлаб, мактуб ёзадиган болалардир. Бу жуда муҳим. Шу маънода, ўз манфаатларимиз, халқимиз, маданиятимиз, ҳудудимиз тилини ҳимоя қилган ҳолда, бутун халқимиз ватан ҳимоячисидир», — деди Путин.

Шундан сўнг Путин стадионда тўпланганлар билан бирга Россия мадҳиясини куйлаган ҳамда концертни тарк этган.

Эслатиб ўтамиз, 21 февраль куни Путиннинг Федерал мажлисга мурожаати бўлиб ўтганда. Унда Россия етакчиси яна бир марта Ғарб давлатларни Украинадаги урушни бошлашда айблаганди. Унинг сўзларига кўра, Россия ҳамма нарсани тинч йўл билан ҳал қилиш учун барча ишларни бажарган, бироқ АҚШ ва НАТО «келажакдаги жанговар ҳаракатлар театрини» ташкил этиб, Украинани катта урушга тайёрламоқда. Шунингдек, Ғарб ва Украина Владимир Путиннинг Федерал Мажлисга мурожаатини танқид қилгани ҳақида хабар берилганди.