«Шахсий қарашларни мажбурий диний қоида сифатида талқин қилишга йўл қўйилмайди» — ИИВ
Тошкентда жамоат жойларида фуқароларга тамаки чекиш билан боғлиқ диний ёндашувларни тушунтирган эркак 6 млн сўм жаримага тортилди
Ижтимоий тармоқларда Тошкент шаҳрида номаълум шахс жамоат жойида фуқароларга тамаки чекиш билан боғлиқ диний ёндашувларни ва тушунтиришларни уқтираётгани акс этган видеолар тарқалди. Пойтахт ИИББнинг маълум қилишича, ўтказилган текширув натижаларига кўра, ушбу шахс 1999 йилда туғилган фуқаро А.Х. экани аниқланиб, у билан профилактик суҳбат ўтказилган.
Маълумотларга кўра, ўтказилган суҳбат давомида гумонланувчи фуқаро тамаки чекиш билан боғлиқ диний ёндашувлар ҳақида тушунтириш олиб борган шахсларни танимаслигини, уларга тамакига нисбатан муносабатини ўз ташаббусига кўра, шахсий диний қарашларидан келиб чиққан ҳолда билдирганини айтиб ўтган.
Бундан ташқари, айбланувчига Конституциянинг 25-моддасига асосан, ҳар ким эркинлик ва шахсий дахлсизлик, шунингдек, 27-моддасига биноан шахсий ҳаётига аралашишдан ҳимояланиш ҳуқуқига эга экани тушунтирилган.
Натижада ушбу ҳолат юзасдидан суд идоралари томонидан фуқаро А.Х.га нисбатан Маъмурий жавобгарлик тўғрисидаги кодекснинг 184-моддаси (диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш)га асосан, БҲМнинг 20 баробари миқдорида жарима жазоси тайинланган.
Мавзуга доир: Тошкентда «аёлларнинг кўчада юриш қоидалари» ҳақида видео тайёрлаган блогерлар жавобгарликка тортилди
Эслатиб ўтамиз, аввалроқ Тошкентдаги ички кийимлар дўконини танқид қилган блогер диний контенти учун жаримага тортилгани ҳамда блогер Олимжон Ҳайдаров 21 миллион сўм жаримага тортилгани ҳақида хабар берилганди.
