Тошкент шаҳри Чилонзор туманидаги 162-сонли ўрта таълим мактаби ўқувчиси тенгдошини пичоқлаб қўйди. Бу ҳақда Бош прокуратура матбуот хизмати Bugun.uz’га хабар берди.

Қайд этилишича, 21 февраль куни куни соат тахминан 11:20 да 18 ёшли 11-синф ўқувчиси А.С. ва параллель синфда ўқувчи И.Р. ўртасида мактабнинг 1-қаватидаги йўлакда келишмовчилик келиб чиққан. Оқибатда А.С. ўзи билан олиб юрган ошхона пичоғи билан И.Р.нинг қорин қисмига бир марта уриб, жароҳат етказган.

Республика шошилинч тиббий ёрдам марказининг 2440-сонли маълумотномасига асосан И.Р.да қорин олди деворини тешиб кирувчи санчилиб кесилган жароҳат борлиги аниқланган.

Ҳолат юзасидан А.С.га нисбатан Жиноят кодексининг 104-моддаси 2-қисми «л» банди (қуролни ёки совуқ қурол сифатида фойдаланилиши мумкин бўлган ашёларни ишлатган ҳолда қасддан баданга оғир шикаст етказиш) билан жиноят иши қўзғатилган. Дастлабки тергов ҳаракатлари олиб борилмоқда.

Маълумот учун, юқорида келтирилган жиноятни содир этганлик учун 5 йилдан 8 йилгача озодликдан маҳрум қилиш жазоси белгиланган.

Аввалроқ Тошкентда гўшт талашган талабалардан бири шеригини пичоқлаб қўйгани, Наманганда 20 ёшли йигит танишини пичоқлагани, «Magic City»да сураткашлардан бири ҳамкасбини пичоқлаб қўйгани тўғрисида хабар берилганди.