Тошкентда бегона эркак болани мактабдан олиб кетмоқчи бўлгани тўғрисида хабар берилганди. Zo‘r TV телеканалининг «Бу кун» дастурида маълум қилинишича, ушбу эркак жавобгарликка тортилган.

Ижтимоий тармоқларда Тошкент шаҳри Яшнобод туманидаги мактаб яқинида эркак 12 ёшли ўқувчининг қўлидан ушлаб тортгани ва бола ундан қочиб кетгани акс этган видео тарқалганди.

Қайд этилишича, жиноят ишлари бўйича Яшнобод тумани судида 29 ёшли эркак спиртли ичимлик истеъмол қилиб, 12 ёшли болани тўхтатиб, уни савол-жавобга тутиб, қўлидан қўйиб юбормасдан, майда безорилик қилган деб топилган.

«Шошилиб югуриб кетаётганида тўхта, йиқилиб тушасан, деган маънода тўхтатдим. Яхши бола экан, салом ҳам берди. Қаерга кетяпсан десам, қиз ўртоғимникига деган жавоб бўлди, кулгим келди. Сабрсизлик билан қўлимдан чиқишга ҳаракат қилди, қолган саволни беришга улгурмасимдан, буёқдан овоз келди. Кейин майли, онасининг назоратида экан, қаергадир жўнатган, деразадан қараб ўтирибди экан деб, кетдим», — дейди у.

Суд ҳукмига кўра, унга Маъмурий жавобгарлик тўғрисидаги кодекснинг 183-моддаси (майда безорилик) билан 10 сутка маъмурий қамоқ жазоси тайинланган.

Эслатиб ўтамиз, аввалроқ ижтимоий тармоқларда Тошкентда бола ўғрилари пайдо бўлгани ҳақидаги хабарлар тарқалганди. Ҳолат юзасидан ИИВ ахборот хизмати раҳбари Шоҳрух Ғиёсов Тошкентда бола ўғрилари пайдо бўлгани айтилган миш-мишларни асоссиз ва ҳақиқатдан йироқ деб атаганди.