Айни вақтда ўз иқтисодиётини оширишда «туртки»га муҳтож Пекин Европа билан муносабатларини яхшилаб, Москвадан «масофа сақлашга» уринмоқда, деб хабар беради The New York Times.

Газета Хитой Коммунистик партияси Марказий қўмитасининг ташқи ишлар бўйича канцелярия комиссияси раҳбари Ван Ининг Европа давлатлари бўйлаб яқинда уюштирган сафарларини мисол қилиб келтиради. Унинг мақсади «ўз мамлакати иқтисодиётини қайта тиклаш ва умумий тил топиш учун Европа давлатларини жалб этиш» бўлган. Таҳлилчиларнинг айтишича, Ван И тўғридан-тўғри Москвани қўллаб-қувватлашдан бош тортиб, «Хитой инқироз чўзилиб кетиши ва кескинлашишини истамаслигини» таъкидлаган.

Шу билан бирга нашрнинг қайд этишича, Пекин диалог ўрнатишга уринаётганига қарамай, АҚШ унга жиддий босим ўтказмоқда. Таҳлилчиларнинг таъкидлашича, тахминан икки йиллик «совуқ муносабатлар», йирик сармоявий келишувларнинг барбод бўлиши ва Украинадаги можародан сўнг «Европа етакчилари Хитой ўз оҳангини юмшатишига ва Москвадан янада узоқлашишига» умид қилган.

«Бунинг ўрнига жаноб Ван И Мюнхенда ўтказилган хавфсизлик бўйича конференцияга келиб, жосус ҳаво шари борасидаги можаро бўйича Қўшма Штатлар билан даҳанаки жангга киришди», дейилади мақолада.

Газетанинг ёзишича, Хитой етакчиси Си Цзиньпин Москвага ташрифидан олдин Европа давлатларига бориши мумкин, бу Ғарб билан муносабатларнинг ёмонлашишининг олдини олади.

Декабрь бошларида АҚШ Россия ва Хитойга қарши янги санкцияларни эълон қилиши тўғрисида хабар берилганди. Жисмоний шахсларга нисбатан жорий этиладиган санкциялар билан ушбу фуқароларнинг АҚШ юсдикциясидаги активларини «музлатиш», уларнинг Қўшма Штатларга сафарларини ва мамлакат билан иш бўйича муносабатларини тақиқлаш назарда тутилганди.

2021 йилда АҚШ қандай ҳолатда Хитойга қарши халқаро изоляция қўллаши айтилганди. Шунингдек, НАТО Хитойнинг ҳарбий соҳадаги ютуқларидан огоҳлантирган.