АҚШ президенти администрацияси Украина ҳукуматини Вашингтон ресурслари чексиз эмаслигидан огоҳлантирди. Бу ҳақда Reuters агентлиги ўз манбаларига таяниб хабар берди.

«Украинадаги уруш қачондир якунланиши кераклигини ҳаммамиз тушунамиз. Ва барачамиз бу имкон қадар тез тугашини истаймиз», — деган агентлик суҳбатдоши.

АҚШ ҳукуматининг Украинага кўрсатаётган ёрдамида муаммолар юзага келиши мумкинлиги ҳақида олдинроқ Politico ва Washington Post манбалари ҳам гапирган. Хусусан, улардан бирига кўра, Вашингтон Киевни ҳужумга ўтишга ундамоқда, чунки ҳозирда вазиятни иккала партия ҳам қўллаб-қувватламоқда, аммо Конгрессдаги республикачиларнинг ҳаракати сабаб бу ўзгариши мумкин.

WP газетаси билан суҳбатда америкалик амалдор Оқ уй ҳозирги ёрдам пакетини ишлатиб бўлгач, Конгрессда қўллаб-қувватловга эга бўлишга қийналади. «Биз бундан кейин ҳам Киевга улар учун мутлақо барча нарсани қила олмаслигимизни тушунтиришга уринамиз», — дейди у.

Аввалроқ АҚШнинг собиқ президенти Дональд Трамп Учинчи жаҳон уруши ҳеч қачон ҳозиргидек яқин бўлмаганини айтганди. Трампнинг сўзларига кўра, амалдаги президент Жо Байден Украинани қўллаб-қувватловчи ҳаракатлари билан дунёни уруш сари ундамоқда.

Эслатиб ўтамиз, 20 февраль куни АҚШ президенти Жо Байден Киевга ташриф буюргани ҳақида хабар берилганди. Байден Украинада бўлиб турган пайти Америка разведка самолётлари, жумладан, ҳаво радарлари билан жиҳозланган E-3 Sentry ва C-135W Rivet Joint электрон бошқариладиган самолётлар Польша ҳаво ҳудудидан Киевни мунтазам равишда кузатиб турган. Айнан АҚШ етакчисининг Киевга ташрифи пайтида бутун Украина бўйлаб ҳаво тревогаси эълон қилинган. Бироқ Россия томони ракета ёки авиация билан мамлакат ҳудудига зарба бермаган.