Россиянинг бир томонлама тартибда Стратегик ҳужум қуроллари тўғрисидаги шартномаси («СНВ-3»)дан чиқиши Москванинг ядровий зарба беришга тайёргарлик кўраётганини билдирмайди. Бу ҳақда АҚШ президенти Жо Байден ABC’га берган интервьюсида маълум қилди.

«Бу катта хато. Бу масъулиятсизликдир. Аммо бунда мен у ядровий қурол ёки шунга ўхшаш нарсадан фойдаланиш ҳақида ўйлаётгани аломатларини кўрмаяпман», — деган Байден.

Байден Россия ва АҚШ «буни тузатишга» қодир эканини, Москванинг шартномадаги иштироки тугатилган бўлса-да, бу соҳада масъулият билан ишлаш кераклигини таъкидлаган.

Россия президенти Владимир Путин 21 февраль куни Федерал мажлисга йиллик мурожаатида унинг мамлакати АҚШ билан имзоланган стратегик ҳужум қуролларини қисқартириш бўйича шартномадан чиқишини айтганди. «Агар Қўшма Штатлар ядровий қуролни синовдан ўтказса, биз ҳам буни амалга оширамиз. Ҳеч кимда глобал стратегик вазиятнинг барбод бўлиши мумкинлиги ҳақида қараш бўлмаслиги керак», — дея қўшимча қилди Путин.

Ўз навбатида АҚШ президентининг миллий хавфсизлик бўйича маслаҳатчиси Жейк Салливан Путиннинг Ғарб борасидаги айбловини «бемаънилик» деб атаган. «Ҳеч ким Россияга ҳужум қилмади. Россияга Украина ёки бошқа бирор томондан ҳарбий таҳдид мавжудлиги борасида шунақа бемаъни тасаввур бор», — дейди Салливан.