Истанбулда тезкор сканерлар усули ёрдамида қулаб тушиш хавфи бўлган уйларни бузиб ташлаш бошланди. Бу ҳақда шаҳар мэри Экрем Имамўғлу Twitter’даги саҳифаси орқали маълум қилди.

«Ушбу жараённи тезлаштириш ва рағбатлантириш учун хавфли бинолардаги квартираларга қўшимча 4,5 минг лира ажратамиз. Мазкур жараёнда барчани жиддий ҳамкорликка таклиф этамиз», — дейди у.

17 февраль куни Истанбул администрацияси зилзила вақтида қулаб тушиши мумкин бўлган 318 та бинони аниқлаганди. Уларда 10 минг инсон истиқомат қилади. «Яна 1525 таси D ва E — хавф юқори бўлган тоифага киради. Биз дастлаб 10 минг киши яшайдиган 318 бино учун режа тайёрладик — уйлар эвакуация қилинади, квартиралар эгаларига ижара ҳақи компенсацияси тўланади», — деганди Истанбул бош котиби ёрдамчиси Буғро Гёкче.

Унинг қўшимча қилишича, шаҳарда тўрт йилдан бери техника университети билан уйларнинг мустаҳкамлигини бепул баҳолаш дастури амалга оширилмоқда. Уч йил ичида ҳукумат 30 мингга яқин мурожаат олган, 6 февралдаги зилзилалардан кейин яна 40 мингга яқин ариза келиб тушган.

Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.

Аввалроқ Туркиянинг эпицентри Қаҳрамонмараш вилоятида жойлашган зилзилалар оқибатида қурбон бўлганлар сони 42 310 кишига етгани тўғрисида хабар берилганди. Табиий офат ҳудудларидан эвакуация қилинганлар сони 448 минг кишидан ошган.