Ўзбекистонда 117 та Volkswagen Caddy «Тез ёрдам» машинаси ҳудудларга тарқатилди
«Jizzakh Auto» томонидан 23 февраль куни «Volkswagen Caddy» тез тиббий ёрдам автомобилларнинг 117 донадан иборат навбатдаги партияси ҳудудларга тақдим этилди. Бу ҳақда Соғлиқни сақлаш вазирлиги матбуот хизмати хабар берди.
Маълум қилинишича, бугунгу кунга келиб «Тез ёрдам»да бешинчи авлод «Volkswagen Caddy» автомашиналари сони 337 тага етган. Хусусан, 220 та «Volkswagen Caddy» тез тиббий ёрдам машиналари билан таъминланган Республика тез тиббий ёрдам маркази автопаркида ушбу турдаги автомобилларнинг сони янги 220 та автомашина қўшилиши ҳисобига 23 февраль куни жами 337 тага етди.
Маълумот учун, биринчи босқичда 230 дона B тоифадаги Ford реанимобиллари Тез тиббий ёрдамни ривожлантириш жамғармаси ҳисобидан Тошкент ва Самарқанд шаҳарларида фойдаланиш учун етказиб берилган. Натижада 2022 йилга келиб республикада 541 та замонавий машина «Тез ёрдам» хизматида ишламоқда.
«Иккинчи босқичда 1000 дона А тоифали тез тиббий ёрдам машинаси харид қилиниши кўзда тутилган бўлиб, ушбу мақсадда Осиё тараққиёт банки лойиҳаси асосида кредит маблағлари ажратилган. Бу орқали тизимдаги маънан эскирган Damas автомобилларини янгилаш кўзда тутилмоқда», — дейилади хабарда.
Қайд этилишича, бешинчи авлод А тоифали Volkswagen Caddy MQB платформасида ишлайди. Улар 1,6 МPI атмосферали мотор билан жиҳозланган, 6 поғонали механик узатмалар қутиси ва 110 от кучига эга. 100 километр масофага автомобиль аралаш циклда 7 литр ёнилғи сарфлайди.
Бугунги кунга қадар қарийб 340 та Volkswagen Caddy жойларга етказиб берилган. Автомобиллар ҳудудлардаги аҳоли сони ва тез тиббий ёрдам машиналарини янгилаш эҳтиёжидан келиб чиқиб тақсимланмоқда. Республика тез тиббий ёрдам маркази директори Абдувоит Ғафуровнинг маълум қилишича, харид қилиниши режалаштирилган яна 640 та тез тиббий ёрдам машинаси Hyundai, Ford, Volkswagen, Iveco каби жаҳон брендларига тегишли бўлади.
Мавзуга доир: Ўзбекистонда «Volkswagen Caddy» тез ёрдам машиналарини етказиб бериш бошланди
Аввалроқ Ўзбекистонда ҳудудларга 1000 та «Volkswagen Caddy» тез тиббий ёрдам машиналари етказилиши ҳақида хабар берилганди.
