Польша Украина армиясида сапёрлар етишмаслиги ҳамда НАТО ўз мутахассисларини жўната олмагани учун миналардан тозалаш операцияси учун Украинага профессионал полициячилар отрядини юборди, деб ёзади Wirtualna Polska.

Нашрнинг ёзишича, «махфий операция» Украина расмийлари ЕИ аксилтеррор бўлинмалари ассоциациясига аъзо мамлакатларга сапёрлар юбориш илтимоси билан мурожаат қилганидан кейин бошланган. Маълумотларга кўра, ташкилотга аъзо 38 давлатдан фақатгина Польша ушбу таклифга рози бўлади. Натижада Польша Ички ишлар вазирлиги бошлиғи Мариуш Каминский топшириғига кўра, гуманитар полиция контингенти тузилади. Унинг таркибида операцияда ихтиёрий равишда қатнашиш истагини билдирган терроризмга қарши кураш полициясининг алоҳида бўлинмалари ходимларидан иборат жами 98 киши бўлган.

Украинага жўнатилган гуруҳ таркибида сапёрлардан ташқари, миссия аъзоларини қўриқлаш учун фельдшерлар ва «жанговар гуруҳ аъзолари» кирган. Топшириқ иштирокчилари октябрь ойи бошида Украинага бориб, у ерда беш ойча қолган. Нашрнинг таъкидлашича, хавфсизлик нуқтаи назаридан операция ҳақида Миллий полиция бош бошқармасидан уларнинг Польшага қайтиши ҳақида расмий тасдиқ олгандан кейингина хабар берилган.

Польшадан келган гуманитар контингент Украина ҳудудида 342 минг квадрат метрдан ортиқ майдонни миналардан тозалаган. Миссия аъзолари 23 февраль куни Варшавага қайтиб келган. Уларни мамлакат президенти Анжей Дуда ва ички ишлар вазири қабул қилган.

Аввалроқ Халқаро атом энергияси агентлиги бош директори Запорожье АЭСи ёнида мина портлаши сабабли Россия ва Украинага боргани, шунингдек, Канада Украина ҳудудини миналардан тозалашга 11 миллион доллар ажратиши ҳақида хабар берилганди.