Қозоғистон бошқа давлатларда вабо тарқалиши муносабати билан чегараларидаги назоратни кучайтирди. Бу ҳақда мамлакат Соғлиқни сақлаш вазирлигига таяниб Tengrinews хабар берди.

Қайд этилишича, Санитария-эпидемиология назорати қўмитаси юқумли касалликларни кузатиш эпидемиологик бошқармаси раҳбари Роза Кожапованинг қайд этишича, дунёнинг қатор давлатларида вабо касаллиги тарқалиши кузатилмоқда.

«Бу асосан Африка, Сурия давлатлари. Қозоғистон бўйича айтадиган бўлсак, маҳаллий ҳолатда вабо охирги 10 йилда қайд этилмаган. Вабо — бу тўғридан-тўғри одамдан одамга сув орқали юқадиган касаллик. Аммо бу йил дунёдаги вазият кескинлашганига қарамай, ичимлик суви сифати ва очиқ ҳавзалар назоратдан ўтказилмоқда. Очиқ сув ҳавзалари мунтазам турли қўзғатувчилар, жумладан, вабо таёқчаларига ҳам текширилмоқда. Бугунги кунда Қозоғистонва вабонинг тарқалиш хавфи йўқ», — дейди Кожапова.

Унинг сўзларига кўра, қатор давлатларда вабо ҳолатлари қайд этилмоқда, Қозоғистон чегарасида назоратлар ўтказиляпти.

«Мамлакатга келган фуқаролар кўздан кечириляпти. Агарда вабонинг дастлабки аломатлари аниқланса, улар изоляцияга олинади», — дейди мутахассис.

Аввалроқ Ўзбекистонда сув қувурлари орқали вабо тарқалиши мумкинлиги ҳақида хабар тарқалганди. «Ўзсувтаъминот» мазкур хабар юзасидан муносабат билдириб, фуқаролардан бу каби ёлғонларга ишонмасликларини ва жўмраклардан сув ичмаслик тўғрисидаги чақириқларга қулоқ солмасликни сўраган. Шунингдек, Нурмат Отабеков Ўзбекистонда вабо касаллиги аниқлангани ҳақидаги хабарларни рад этганди.