Украина ва Ғарб давлатлари музокараларни бошлаш учун биринчи навбатда «қуролларни қўйиши» ва Россия шаҳарларини ўққа тутишни тўхтатиши керак. Бу ҳақда мамлакат ташқи ишлар вазири ўринбосари Михаил Галузин маълум қилди, деб хабар беради «ТАСС».

«Шундан кейин янги геосиёсий реаллик базасида муҳокама ўтказиш мумкин», — дейди дипломат.

Унинг қўшимча қилишича, Россия ўз мақсадларида дипломатия орқали эришишга тайёр, бироқ бунга Украина ҳукуматининг Россияни «жанг майдонида ҳарбий мағлубиятга» учратишга қарор қилган «мутлақо ноконструктив позицияси» халақит бермоқда.

«Айни вақтда музокаралар қайта тикланиши фақат Украина ҳукумати ва уларнинг Ғарбдаги кураторларининг мавжуд геосиёсий воқеликни идрок этишга тайёрлиги билан боғлиқ», — дейди Галузин.

Бундан олдин Россия президентининг матбуот котиби Дмитрий Песков Украина тинчлик музокараларини бошлаш учун сиёсий ирода кўрсатиши кераклигини айтганди. «Россиянинг яхши маълум бўлган талабларини муҳокама қилишга тайёрлик учун сиёсий ирода бўлиши керак», — деганди у.

Аввалроқ Америка президенти Индонезияда ўтказиладиган G20 саммитида Путин билан учрашишдан маъно кўрмаётгани, бироқ Россияда ҳибсга олинган АҚШ фуқароларини муҳокама қилишга тайёрлигини айтганди. Ўз навбатида ноябрь ойи бошларида Украина президенти Владимир Зеленский Путин билан махсус шартлар асосида музокара ўтказишга тайёрлигини билдирган эди.