Буюк Британия Мудофаа вазирлиги Донецкдаги Россия қўшинлари Бахмутни қуршаб олишга, шунингдек, Угледарга янги штрумни амалга оширишга тайёргарлик кўраётганини маълум қилди. Бу ҳақда мамлакат разведкасининг кунлик хабарномасида сўз боради.

Охирги икки кун давомида Бахмут яқинида оғир жанглар давом этмоқда, «Россия охирги 6 ҳафтадан бери секин-аста қуршовни амалга ошираётганига қарамай», Украина кучларига Ғарб ёрдамлари етказиладиган йўллар очиқ қоляпти.

Британия Мудофаа вазирининг қайд этишича, Угледар шаҳри яна қаттиқ ўққа тутилди. «Россия ушбу ҳудудда навбатдаги ҳужумга тайёргарлик кўраётгани борасида реал хавф мавжуд», — дейди британиялик ҳарбийлар. Уларнинг таъкидлашича, русларнинг 2022 йил охири ва 2023 йил февралида Угледарга уюштирган ҳужуми муваффақиятсиз якунланган.

Маълумотларга кўра, Угледардаги жанговар ҳаракатларга олдингидек генерал-полковник Рустам Мурадов қўмондонлик қилаётган Шарқий ҳарбий округ қўшинлари жавоб бермоқда. Британиялик ҳарбийларнинг фикрича, Мурадовга олдинги муваффақиятсизлигидан кейин натижаларни яхшилаши учун босим ўтказилмоқда.

Украина Қуролли Кучлари Бош штабининг маълум қилишича, Россия қўшинлари шаҳарда шимоли-ғарбга ҳаракатланиб, Бахмутни эгаллаб олиш борасидаги уринишларини давом эттирмоқда.

Аввалроқ Россия президенти Мудофаа вазирлигини ядровий қуролларни синовдан ўтказишга тайёрлашга чақиргани, Ғарб давлатлари Украинага 321 та танк етказиб беришн  ваъда қилгани, Буюк Британия Украинада ҳарбий техникалар ишлаб чиқаришни бошлаши мумкинлиги, Украина баҳорги ҳужумга қадар Ғарб давлатлари ваъда қилган танкларнинг чорак қисмини олиши ҳақида хабар берилганди.