Тошкентда кўп қаватли уй ертўласи ўзбошимчалик билан ўзгартирилгани аниқланди
Тошкент шаҳрининг Шайхонтоҳур туманида кўп қаватли уй ертўласи ўзбошимчалик билан ўзгартирилгани аниқланди. Бу ҳақда Уй-жой коммунал хизмат кўрсатиш вазирлиги ҳузуридаги Қурилиш ва уй-жой коммунал хўжалиги соҳасида назорат инспекцияси хабар берди.
Қайд этилишича, инспекция томонидан аҳоли мурожаатларига асосан кўп қаватли уйларда ноқонуний қурилмаларни аниқлаш ва ҳуқуқбузарларга нисбатан тегишли чоралар кўриш ишлари ўтказилмоқда.
Хусусан, Тошкент шаҳрининг Шайхонтоҳур тумани, Лабзак даҳаси 1а уйнинг ертўласи текширилганда, тегишли талабларни бузган ҳолатда ўзгартирилгани аниқланган. Фуқаро лойиҳа ҳужжатларидан четга чиққан ҳолда бинонинг таянч деворлари ҳамда коммуникация тармоқлари жойлашувини ўзгартирган.
Инспекция томонидан ҳуқуқбузарга нисбатан тегишли тартибда маъмурий баённома расмийлаштирилиб, 15 кун муддатда бинони ўз ҳолига қайтариш бўйича топшириқ берилган.
Аввалроқ Тошкентнинг Янгиҳаёт тумани «Янги турмуш» маҳалласида Megapolic Building компанияси томонидан 2021 йилда фойдаланишга топширилган янги турар жой биносининг томида ноқонуний қурилиш аниқланганди.
Мавзуга доир: Тошкент шаҳрида янги қурилишларга чеклов ўрнатилади
Аввалроқ Қурилиш ва уй-жой коммунал хўжалиги вазирининг биринчи ўринбосари Даврон Одилов Ўзбекистонда қурилаётган объектларга буюртмачилар масъул эканини маълум қилганди. Унинг бу гапи ижтимоий тармоқларда кенг муҳокамаларга сабаб бўлгач, Қурилиш вазирлиги ҳолатга расмий муносабат билдирган. Қурилиш вазирлигига кўра, тақдим этилган видеолавҳада гап қурилишда жавобгар аввало, буюртмачи экани хусусида борган. Боиси буюртмачи техник назорат бўйича мутахассисни бириктиради ёки ушбу фаолият турини амалга ошириш ҳуқуқига эга бўлган юридик шахсни шартнома асосида жалб қилади.
