«Туркия камида 500 мингта янги уй қуриши керак» — БМТ
Туркияда зилзилалардан кейин камида 500 мингта янги уй қурилиши керак. Бу ҳақда БМТ баёнотига таяниб Anadolu хабар берди.
БМТ экспертларининг қайд этишича, табиий офат оқибатида 1,5 миллион одам бошпанасиз қолган.
«Бу шуҳбасиз, Туркия тарихидаги энг йирик зилзилалардан бири ва мамлакат шу пайтгача дуч келган энг катта табиий офатдир», — дейди БМТнинг Туркия бўйича Тараққиёт дастури вакили Луиза Винтон.
Винтоннинг сўзларига кўра, Туркияни қайта тиклаш ишлари доирасида биринчи навбатда 116—210 миллион тонна вайрона қолдиқларини тозлаш керак. «Таққослаш учун, Туркияда кўплаб қурбонларга олиб келган 1999 йилги зилзила оқибатида 13 миллион тонна вайрона қолдиқлари юзага келган», — дейди у.
Сурия шимоли-ғарбида эса 9 миллионга яқин одам жабрланган ва камида 6 минг киши ҳалок бўлган, мамлакатга халқаро гуманитар ёрдамни етказиш давом этмоқда.
Таъкидланишича, умумий ҳисобда 9 февраль куни Туркия чегарасини юк ортилган 227 та юк машинаси кесиб ўтган. Сурияга эса 100 тоннага яқин гуманитар ёрдамлар етказилган. Улар орасидан дори-дармонлар, анестезия воситалари, жарроҳлик ускуналари ўрин олган.
Эслатиб ўтамиз, магнитудаси 7,7 га тенг зилзила 6 февраль тонгида Сурия чегарасидаги Қаҳрамонмараш туманида кузатилган. Туркия президенти Ражаб Тоййиб Эрдўғоннинг айтишича, ҳалокат 10 та вилоятга таъсир кўрсатган ва сўнгги 84 йил ичидаги энг ҳалокатлиси ҳисобланади: 1939 йилда Туркияда содир бўлган зилзила оқибатида 30 мингдан ортиқ одам ҳалок бўлганди.
Туркия вице-президенти Фуат Октайнинг айтишича, зилзилаларда инсонларнинг оммавий ҳалок бўлишида айбдор дея гумонланаётган камида 113 кишини ҳибсга олишга ордер берилган. Тергов давомида бир неча киши ҳибсга олинган. 11 февраль куни Истанбул аэропортида Меҳмет Яшар Кошкун ушланганди — у зилзила вақтида бутунлай қулаб тушган 12 қаватли турар жой биносининг қурилиши билан шуғулланган пудратчидир. Anadolu агентлиги маълумотларига кўра, у Черногорияга учиб кетмоқчи бўлган. Мазкур аэропортда 12 февраль куни Явуз Каракуш исмли яна бир пудратчи рафиқаси билан қўлга олинган, улар Грузияга учмоқчи бўлган.
